«Хәзер ширбәт аен уйларга да юк», яки Илнар Закиров өйләнде

Динә дзюдо буенча 2021 елда Россия чемпионы, билбау көрәше буенча 4 тапкыр Дөнья чемпионы исеменә лаек булды. Туй көне итеп матур датаны - 25.08.2025 не сайлаганнар. Илнар белән Динә никахларын узган елның августында үткәргән иде.
- Илнар, чын күңелдән туй көнегез белән котлыйбыз! Гаилә бәхете, мәхәббәт, тигез гомер телибез! Динә белән күптән танышмы син? Кайсы як кияве булдың инде?
- Рәхмәт бик зур! Динә тумышы белән Чиләбедән.  Танышканыбызга чама белән сигез ел бар. Әлегә Чистайда яшибез (Илнар татарча көрәш буенча Чистай районы данын яклый. Анда тренерлык эшен алып бара. - Л.Й.)

- Туй кайда узды, Илнар? Көрәшчеләр дә күп булгандыр?
- Казанда Алсу Маликованың банкетлар залында уздырдык. Бик матур үтте. Без бик канәгать. Алып баручы итеп Эминны чакырдык. Көрәшче Илназ Рамазанов туен да ул алып барган иде. Кунакларга килгәндә, әйе, ярты зал көрәшче дусларым иде. 

- 25нче числога бик күп туйлар билгеләнгән, дигәннәр иде. Гаризаны кайчанрак бирдегез?
- Апрель башында бронь ясадык. Дүшәмбе булгач, чират алай бик сизелмәде. Без бит алдан язылган идек. Мәҗлес үткәрүне генә шушы датага билгеләдек.

- Ширбәт ае турында уйланасызмы? Юллама итеп, бәрәңге алышырга чакырмадылармы алай-болай (көлешәбез)?
- Алдатмадык, ширбәт аен Сабантуйларга хәтле үткәреп куйдык (көлә). Хәзер ул хакта уйларга да юк. Урак өсте башлана. Бөтен көчне җыеп, яңа сезонда буласы ярышларга әзерләнә башларга кирәк!

Лилия ЙОСЫПОВА.