"Үзебезнең лидер иде", яки "Грегор" Теләчедән киткән

– Лидерларга башка командаларның кызыгуы гадәти күренеш инде ул.  Әмма Динар үзебезнең лидер иде. Үз төбәгеңнән үсеп чыккан көрәшчеләр китеп барганда күңелгә рәхәт түгел, – дип сөйләде “ШК” хәбәрчесенә районның спорт бүлеге җитәкчесе, үзе дә күп еллар Теләче данын яклап бил алышкан Зөлфәт Ибраһимов. – Динар Теләче районында туып-үсте, көрәшкә беренче адымнарын туып-үскән авыл мәктәбендә ясады, кеченәдән район данын яклап, үсмерләр һәм яшьләр арасында республикакүләм ярышларда җиңү яулады.

Район вәкиле сүзләренчә, Динар Кәримуллинның Теләчедә эше дә булган. Бу очракта артык аптырарга кирәкмидер: бүген Лаеш районын Теләчедә эшләп киткән Илдус Зарипов җитәкли. Район Советы аппаратын көрәш дөньясына мәгълүм шәхес Азат Нурмөхәммәтов җитәкли. Ә Динар Кәримуллин – Азатның авылдашы.

Шулай итеп, үзе дә читтән көрәшчеләр җәлеп итү белән мавыккан Теләчедән соңгы берничә елда үзендә туып-үскән ике лидер көрәшче китә. Раил Нургалиев Биектауга киткәндә җитәкчелек үзара сөйләшкән булса, бу очракта түрәләр арасында андый сөйләшү-килешүләр дә булмаган, дип сөйлиләр. Теләче Раил Нургалиевка каршы торырлык көрәшче әзерли алды анысы. Ә менә Динарны ега алырлыклар табылырмы? Вакыт күрсәтер.