«Зенит-Казан» төп уенчыларсыз да көндәшләренә мастер-класс күрсәтте

Беренче ике партияне казанлылар җиңел генә алды. Кемероводан килгән команда «Зенит-Казан»ның искиткеч уены артыннан карап, баш селкеп кенә торды. Өсләреннән очкан тупны алар күз белән генә озаттылар. Уенда приём да, подача да уңышлы булды. Көндәшләрнең баш тренеры Сергей Троцкий уеннан соң сорауларга җавап биргәндә: “Әйе, мондый тәҗрибәле һәм шул ук вакытта яшь, югары дәрәҗәле командага каршы тору бик авыр. Уенга кадәр «Зенит-Казан»ның фаворит буласы билгеле иде инде. Соңгы партия гына ниндидер өмет чаткылары өстәде, моның өчен уенчыларга рәхмәт әйтергә кирәк. Каршы як команданың нерв күзәнәкләре бераз какшагандыр дип уйлыйм” – диде.

Дөрестән дә, башта өченче партия ышанычлы җиңүгә таба бара иде, ләкин исәп 24:19 булганда «Кузбасс» командасы уянып, берничә уңышлы һөҗүм ясап исәпне 24:22 итте. «Зенит-Казан»ның уенчысы Дмитрий Волков: “Уйнаудан туктадык дип әйтмәс идем. Барысын да контрольдә тоттык, уенның безнең файдага тәмамлануына ышандык. Подача һәм тупны алу ягыннан без стабиль булдык” – дип искәртте. Уенда иң күп очко җыючы булып Дражен Лубурич (16 очко, 4 эйс) танылды. Иң күп блокны Казан командасының капитаны Артём Вольвич (9 очко, 2 блок) куйды. Ни өчен уенның соңгы минутларында команданың йомшаруын Зенит-Казанның баш тренеры Алексей Вербов: “ Әнә, Дмитрий Волковтан сорагыз. Мин аңа ышанам, барысын да төгәл һәм уен буенча әйткәндер (көлә). Гомумән алганда, командага әфәрин, соңгы өч минутта гына бераз “шаярып”, нерваларда уйнап алдылар. Ул вакытта да уенчылар үзара көлештеләр, бу уенның алар контролендә булуын исбатлый”- диде.

Уенда команданың лидерлары булган Максим Михайлов, Сантьяго Данани Ла Фуэнте чыгыш ясамады.
Әлеге очрашудан соң «Зенит-Казан» таблицада 34 очко белән беренче урында бара. 

Киләсе уен 14 декабрь көнне МГТУ (Мәскәү) командасына каршы булачак.

Илнар Камаев