Андрей Кондратьев: «Һава торышы әйбәт, кәефләр шәп. Димәк, сайлаулар да шундый рухта үтәчәк»

Активлык иртәдән үк башланган. Бүген тавыш бирүнең беренче көне. Татарстанда 2807 сайлау участогы кабат үз ишеген ачкан. Бу көннәрдә республикада 500дән артык кешедән торган 65 территориаль сайлау комиссиясе эшләячәк. Тагын 45 өстәмә участок хастаханәләрдә, шифаханәләрдә, тикшерү изоляторында, тимер юл вокзалында һәм аэропортта ачылачак. Исегезгә төшерәбез, Россия Президентын сайлау өч көн - 15 марттан һәм 17 мартка кадәр дәвам итәчәк.

– Актив тавыш бирүләр иртәдән үк күзәтелде. Гәрчә без сайлаучыларның күпләп килүен төштән соң гына көткән идек. Һава торышы әйбәт, кәефләр шәп. Димәк, сайлаулар да шундый рухта үтәчәк. Әле бирегә килгәнче берничә сайлау участогында булдым. Шундый тыныч атмосфера хөкем сөрә. Ишектән үк мөлаем апа-кызлар каршы ала. Барысы да исәнләшеп, участок буенча сайлау урынына чакыралар. Сайлау участоклары барысы да тиешенчә җиһазландырылган. Аерым алганда, иминлекне тәэмин итүдә эшләүче Росгвардия, Татарстан эчке министрлыгы хезмәткәрләренә рәхмәтемне белдерәм. Шулай ук табиблар да кизү тора. Һәр участок бер йодрык сыман эшли. Өч көнгә сузылачак сайлаулар да нәкь бүгенге сыман шундый күтәренке рухта үтәр дип ышанам, – диде Кондратьев. 

Комиссия рәисе сүзләренчә, Үзәк сайлау комиссиясе серверларына 12 миллионга якын һөҗүм булган, бу, беренче чиратта, сайлау үткәрүгә комачау итү белән бәйле.