Чит илгә чыкканда да, кыямәт көнендә дә ”Бурычың бармы?”-дип сорыйлар икән

— ЮХИДИ идарәсе белән берлектә “Юл приставы” рейдлары даими үткәрелә. Махсус компьютер-планшет ярдәмендә транспорт чарасының дәүләт теркәү саны буенча кешенең бурычлары бармы яки юкмы икәнлеге ачыклана. Ел башыннан инде 243 транспорт чарасына арест салынды. Бурычларын каплаган хуҗаларына 90 автомобиль кире кайтарып бирелде, - дип сөйләде Әнвәр Закиров.

Юл хәрәкәте кагыйдәләрен төгәл үтәү, автомобильне хәрәкәткә комачаулык тудырырлык рәвештә теләсә кайда куеп калдырмау хәерле. Штраф мәйданчыгына алып кителгән машиналар хуҗаларының салым һәм җыем бурычлары да тикшерелә. Суд приставлары быел штраф мәйданчыкларындагы 91 транспорт чарасына арест салган. ЮХИДИ штрафын һәм башка бурычларыңны түләмичә торып, машинаңны ала алмыйсың дигән сүз бу.

Алиментчылар аерым күзәтчелектә тотыла. Ел башыннан 200 миллион сум алимент түләттерелгән, алимент түләүдән качып йөргән 300 кешегә җинаять эше үк кузгатылган.

Җәй -дәррәү отпуск-ялларга чыгу чоры. Чит илләргә барырга җыенган очракларда, бурычларыңны 1 ай алдан бетерү мәслихәт. Чөнки, соңгы көннәрдә генә түләсәң, мәгълүмат барлык органнарга да барып ирешеп өлгермәскә мөмкин.

— Кешенең төрле түләүләр бурычлары 30 мең сумнан артса, ул чит илгә чыгарылмый. Бу чикләү Россия буенча сәфәрләргә кагылмый. Татарстан Республикасы дәүләт хезмәт күрсәтүләре порталы, МФЦ, шулай ук Татарстан буенча суд приставлары федераль хезмәте идарәсе сайты аша үзеңнең түләү бурычларың бармы яки юкмы икәнлеген әледән-әле караштырып торырга кирәк. Бурычларың булу чит илгә сәфәргә яки башка эшләр башкарырга көтелмәгән киртә булып басарга мөмкин, - диде Әнвәр Закиров.

Татарстан буенча баш суд приставы “бурычларсыз яшәсәң, җанга тынычрак” дип киңәш бирде.

Идарәнең “Кайнар элемтә” телефоны: 8 (843) 514-92-21.