Рөстәм Миңнеханов: «Микрорайонда яшәүчеләрнең иминлеген тәэмин итү мөһим»

Рөстәм Миңнеханов Казанның «Салават Күпере» микрорайонында тәртип саклау җәмәгать пунктында булды.

Яңа ачылган җәмәгать пунктында (Наил Йосыпов ур., 8) 6 участок полиция хезмәткәре, 2 балигъ булмаганнар эшләре инспекторы һәм 2 муниципаль хезмәткәр хезмәт итәчәк.

ТР Президенты саклау пунктының бүлмәләрен: кунакларны кабул итү һәм консультацияләү зонасын, хезмәткәрләрнең эш кабинетларын карады. Барлык бүлмәләр дә җайланмалар һәм кирәкле җиһазлар белән тәэмин ителгән.

«Залесный» торак массивы һәм «Салават Күпере» торак комплексы территориясендә 90 күп фатирлы йорт һәм 2 меңгә якын индивидуаль торак бина урнашкан, аларда 27 меңнән артык кеше яши. Якын арада «Салават Күпере» торак комплексының 2 нче чираты төзелү сәбәпле, халык санының тагын 5 меңгә артуы фаразлана.

Рөстәм Миңнеханов интенсив үсештәге микрорайонда яшәүчеләрнең иминлеген тәэмин итүнең мөһимлеген билгеләп үтте. Ул тәртип саклауның өстәмә икенче пунктын ачу өчен тагын бер бина сайларга кушты.