Билет алырга ашык!

Россия тарихында беренче булган әлеге зур чараны карау безнең ил вәкилләренә 1280 сумга төшәчәк. Бу, әлбәттә, иң очсыз, дүртенче категория билетлары. Шулай ук Бразилия белән Көньяк Африка республикасы җанатарларына да билетларны ташлама белән алу мөмкинлеге бирелә. Футбол мөмкинлекләре чикле булган яки гәүдә авырлыгы артык зур булу аркасында бер утыргычка гына сыймаган кешеләр өчен дә ачык - алар өчен аерым билетлар сатыла. «Россия-2018» оештыру комитеты рәисе Виталий Мутко сүзләренчә, билетларның күп өлеше безнең ил вәкилләренә тапшырылачак.

Конфедерацияләр Кубогындагы кебек үк тулыканлы җанатар булу өчен билет алу гына җитми - Fan-ID паспортын булдыру кирәк. Әлеге паспортны Казанда тагын ике җирдә тапшыра башлаячаклар: беренчесе - «Казан Арена» стадионы, икенчесе - Кремль яр буе. Татарстанның яшьләр эшләре һәм спорт министры Владимир Леонов хәбәр иткәнчә, андый пунктлар барлыгы алты булачак.

- Тора-бара Fan-IDны шәһәргә, илгә керү пунктларында, мәсәлән, аэропорт, тимер юл вокзалында да алып булачак. Ләкин бу әле гамәлгә кертелмәгән проект кына, аны эшләп бетерәсе бар, - диде министр.

Чемпионатның беренче уеннары июнь аенда гына башланса да, «Казан-Арена» стадионы инде майда ук тулысынча әзер булырга тиеш. Ярышларга кадәр берничә тест матчы да узачак. Стадионның газоны да шул ук килеш кала. Оештыручылар сүзләренчә, аның газоны «прошивка» техникасы буенча, заманча технологияләрне кулланып ясалган. Шуңа да газон нинди дә булса җитди үзгәрешләр таләп итми.

«Казан-Арена»ны экологик стандартларга тулысынча туры килә дип бәяләгән белгечләр. Бу - Россиядә беренче «яшел» сертификат алган стадион. Ул электр энергиясен, суны экономияли, чүпне сортларга бүлеп җыя. Ә әйләнә-тирәсендәге яшеллеккә су сибү өчен яңгыр суын куллана.

Чемпионатка кадәр бездә шундый ук «шәп» газонлы футбол мәйданчыгы тагын дүртәү булачак. Аларны «Свияга» ату комплексы янында, «Идел» яшьләр үзәгендә, Мирный бистәсендәге «Динамо» стадионында һәм «Трудовые резервы» стадионында күреп булачак.

10 октябрь көнне Россия җыелмасы Иран футболчыларына каршы уйный. Әлеге матч кысаларында, киләсе Дөнья чемпионатын кабул итүче шәһәрләр семинары булачак. Биредә футбол бәйрәмен тиешле дәрәҗәдә кабул итүгә кагылышлы мәсьәләләр каралачак.