Иске елның соңгы көннәрендә кары да, бураны да булачак: арыган килеш юлга чыкмаска тырышыгыз

Эчке эшләр министрлыгының ТР буенча ЮХИДИ идарәсе машина йөртүчеләрне юлларда бик сак булырга чакыра. Машина йөртүчеләр начар һава торышы шартларында тизлекне сакларга, каршы як юлга чыгу кагыйдәләрен үтәргә, пассажирларны йөртүдәге куркынычсызлык кагыйдәләрен үтәргә тиеш. Саклык каешларын эләктерергә онытмагыз. Исегезгә төшерәбез, балаларны җиңел машинада алгы утыргычта 12 яшькә кадәр, арткы утыргычта 7 яшькә кадәр махсус утыргычларда йөртергә кирәк. ЮХИДИ идарәсе шулай ук 12 яшькә кадәрге балаларны да арткы утыргычта махсус “кресло”да утыртырга киңәш итә. Гомумән, арган килеш рульгә утырмаска кирәк.

Һава торышының үзгәреше җәяүле йөри торган юлларда да саклык таләп итә. Җәяүлеләр кичүен чыкканда да сак булыгыз. Бигрәк тә балаларны кулдан ычкындырмагыз. Хәзер бигрәк тә яктылык кайтаргыч элементлары булган киемнәрне кию кирәк. Балаларның киемнәрендә генә түгел, өлкәннәргә дә яктылык кайтаргыч элементлар (фликерлар) – брелокларны, беләзекләрне урнаштыру мәҗбүри бүген. Баланың фликерларын рюкзагына, җиңенең өске өлешенә, баш киеменә урнаштыру зарур. Яктылык кайтаргыч элементларны кешеләргә генә түгел, йорт хайваннарының муенчакларына да урнаштырырга кирәк.

Җәяүлеләр кичүендә җәяүлегә юл бирмәү очраклары да,  автомобильләрнең светофорның рөхсәт ителмәгән төсенә үтүе, юлларда җәяүленең күренмәве дә фаҗигаләр килеп чыгуга сәбәп булып тора.
ЮХИДИ идарәсе ерак юлга чыкканда  үзегез белән җылы киемнәр, ашау-эчү,  ягулык запасы алырга куша. Көтелмәгән хәлләр килеп чыкканда, ярдәм сорап 8(843)5333888 телефонына шалтыратырга мөмкин.

Анна Арахамия фотосы