Казанда кече ярминкәләр башлана

Бу атнаның «эшлекле дүшәмбе» киңәшмәсендә мэр Илсур Метшин: «Казан базарларында авыл хуҗалыгы ярминкәләре кабат башланачак. Республиканың Авыл хуҗалыгы һәм азык-төлек министрлыгы шушындый тәкъдим белән чыкты, моның өчен аларга зур рәхмәт!» - дип белдерде.

Министрлыкның азык-төлек базарын үстерү бүлегендә аңлатуларынча, әлеге ярминкәләр узган елның көзге-кышкы айларындагы кебек колачлы булмаячак. Агропредприятиеләр һәм фермерлар Казанда шимбә көннәрендә кече ярминкәләр оештырырга әзер булуларын белдергәннәр. Үткән шимбәдә фермерлар Яңа Савин районының Адоратский урамындагы базарда, ә Татпотребсоюз җәмгыяте Чехов базарында сәүдә оештырырга өлгергән инде. Иң мөһиме агропредприятиеләр, фермерлар һәм шәхси хуҗалыклар оештырган җырлы-биюле ярминкәләрдә продукция сыйфатлы да, бәясе дә арзанрак.

Узган елгы мәгълүматләр буенча, башкалада былтыр сентябрьдан декабрь ахырына кадәр барган авыл хуҗалыгы ярминкәләрендә 760 миллион сумлык продукция сатылган.

Казанлылар 6,2 мең тонна бәрәңге, 3,1 мең тонна яшелчә, 348 тонна ярма, 6,5 миллион данә йомырка һәм башка ашамлыклар алган.