Казанга ноябрь башында килергә тырыш: сюрприз көтә!

- Ноябрь башында Казанның быелгы 3 миллионынчы туристы ачыкланачак. Ул кешегә Казанның иң яхшы кунакханәсендә бушлай яшәү урыны бирелә, истә калырлык экскурсияләр, күңел ачулар оештырыла, - дип хәбәр итте “эшлекле дүшәмбе” киңәшмәсендә шәһәр башкарма комитетының туристлыкны үстерү буенча комитеты директоры Дарья Санникова.

Казанга гыйнвар-август айларында 2 миллион 650 мең турист килеп киткән инде, хәзер 3 миллионга якынлашабыз икән.

Ничекләр генә 3 миллионынчы турист булып, үзеңне патшаларча хис итәргә соң? Казанда теркәлеп яшәмәүче дөньяның һәр кешесенә тәтергә мөмкин әлеге бәхет очрагы. Түбәндәге нечкәлекләрне исәпкә алырга гына кирәк.

Дарья Санникова аңлатканча, Казанга ноябрь башында сәфәр кылу зарур. Чөнки, 3 миллион ноябрь башларында тула. Казанга автобуста берьюлы 50 турист килеп төшәргә дә мөмкин. Андый очракта генератор ярдәмендә ачыклау үткәрелә ягъни теләсә-кайсы бер сан килеп чыга.
Казанга ноябрь башында килергә җыенган кеше 3million-tourist-kzn.ru сайтында анкета-заявка тутырырга тиеш.

- Әгәр турист үзе генә түгел, ә гаиләсе белән Казанга килә икән, аларның бөтен гаилә әгъзалары “3 миллионынчы турист” булып исәпләнә. Бу очракта,  3 миллионынчы туристка исәпләнелгән программа бөтен гаиләгә күрсәтелә, - диде Дарья Санникова. - Туристның (туристларның) автобус, поезд яки авиабилеты булырга тиеш. Казанлылар 3 миллионынчы туристка сый-хөрмәт күрсәтү программасына үз тәкъдимнәрен әйтә ала. Мәсәлән, кайсы тарихи урыннарны күрсәтергә, милли аш-сулардан кайсысы белән сыйларга. Тәкъдимнәрне 3million-tourist-kzn.ru сайтына юллагыз.