Кәләшләр картаймый

«Кәләшләр вальсы» фестивале һәр елны Казан мэриясе, Казан шәһәре ЗАГСы, ТР Министрлар Кабинеты ярдәмендә оештырыла. Бу ел проект өчен аеруча истәлекле булачак, чөнки ул - юбилей елы, фестивальгә биш яшь тула.
Проектта, кайчан кияүгә чыгуларына карамастан, теләге булган һәр кеше катнаша ала. Анда катнашу өчен www.valsnevest.ru сайтына кереп, анкета тутырырга һәм агымдагы елның 8 сентябрендә узачак кастингта катнашырга кирәк. Кастинг нәтиҗәләре буенча проектның илле финалисты ачыклана. Алар исә бер ай дәвамында «Кәләшләр вальсы»ның 6 октябрьдә булачак финал көненә әзерләнәчәк.
Традиция буенча проектта катнашучы кәләшләр һәр хатын-кыз өчен кызыклы һәм файдалы булган белемнәр туплар, төрле чараларга йөрер дип көтелә. «Кәләшләр вальсы» ул - хореография, режиссура, стиль, дефиле, фото һәм видео төшерү профессионаллары белән эшләү дә. Моннан кала ул - финал көненең онытылмаслык мизгелләре, тормыш иптәшләренең гашыйк күзләре һәм янәшәдәгеләрнең соклануы, дип хәбәр итә аны оештыручы Диана Хәйруллина.