Мамадышны кар басты...

Кичә Мамадышны кар басты... «У-у-у, бездә кар явып күрсәтте дә соң кичә... Иртән торып урамга чыкканда, бөтен җир ап-ак иде: ишегалдына һәм түбәләргә кар явып тутырган. Әле көне буе да яуды ул, туктап та тормады. Кызык итте безне табигать: карлар менә-менә эреп бетә дип торганда, яңадан кыш килде дә куйды. Юллар да бик начар иде, машиналар районга көчкә барып кайтты», - дип сөйләде мамадышлылар. Районның кайбер урыннарында кар хәтта 20 см га кадәр яуган. Мамадышта гына да түгел, республикабызның берничә районында кар явып узган кичә: Түбән Кама, Чаллы, Чистайны һәм башка районнарны да күмеп киткән ул.
Казанның үзендә кар яумаса да, урамда болытлы һәм салкын иде. Бүген дә һава торышы сөендерми. Көндезге якта 3-8 градус җылы вәгъдә итсәләр дә, 13 апрельнең төнендә 4 градуска кадәр салкын булачак. Болытлы һава, урыны белән юеш кар яварга да мөмкин. Көндез исә 4-9 градус җылы булачак, дип хәбәр итә ТР Гидрометеорология һәм әйләнә-тирә мохит мониторингы идарәсе.
Кемгә сөенеч, кемгә көенеч дигәндәй, кар яуганга авыл хуҗалыгы өлкәсендә эшләүчеләр сөенә. Кар яву ул - туфрактагы дымлылык арта дигән сүз, ди алар. Ә бу исә уңыш яхшы булачак дигәнне аңлата. Бер михнәтнең бер рәхәте була, дип әйтә бит халык та. Табигатьтә нинди генә үзгәрешләр килеп чыкса да, хәерлегә генә юрыйк!..