«Мондый бәйрәм бездә беренче тапкыр уза!»: «ШК» газетасы «Безнең авыл – 2» бәйгесе җиңүчесе Кече Шырдан авылында кунакта
Яшел Үзән районының Кече Шырдан авылы халкының бердәмлегенә һәм үҗәтлегенә бәйге барышында ук сокланган идек. Ә килеп төшкәч авылы үзенең табигате, саф һавасы, тырыш, ихлас кешеләре белән бер күрүдән яраттырды. «ШК» десанты анда Сабантуенда катнашып, җырлап, биеп, Пушкин яратып ашаган Шырдан катыгыннан авыз итеп, Каюм Насыйри рецепты буенча пешерелгән чәй, чишмә суларын эчеп, бәйгегә нәтиҗә ясап кайтты.
Яшел Үзән районының Кече Шырдан авылы халкының бердәмлегенә һәм үҗәтлегенә бәйге барышында ук сокланган идек. Ә килеп төшкәч авылы үзенең табигате, саф һавасы, тырыш, ихлас кешеләре белән бер күрүдән яраттырды. «ШК» десанты анда Сабантуенда катнашып, җырлап, биеп, Пушкин яратып ашаган Шырдан катыгыннан авыз итеп, Каюм Насыйри рецепты буенча пешерелгән чәй, чишмә суларын эчеп, бәйгегә нәтиҗә ясап кайтты.
Кече Шырданга кунакка эстрадабызның танылган җырчылары Ришат Фазлыйәхмәтов, Рәсим Фасыйхов, Альбина Кармышева, сүз остасы Алмаз Хәмзинны чакырдык. Бик күңелле, җанлы, рәхәт бәйрәм булды.
Нинди авыр елларда да Сабан туен уздырмый калмаган шырданлылар. Ә менә мондые беренче тапкыр узды, диләр. «30 ел артистларның килгәне юк иде», – ди авылның мәдәният йорты җитәкчесе Рамил Шакиров. Халык артистларга кушылып биеде дә, җырлады да, уеннарда да катнашты.
Газетага язылучылар арасында бүләкләр дә уйнатылды. «Шәһри Казан»ны ун ел яздыручы тугры укучыбыз Фәрит Мозаффаровка редакторыбыз аерым бүләк тапшырды. Сабан туе көрәшсез булмый. Абсолют батыр булып Олы Шырдан авылы егете Динар Хуҗин калды.
Бәйрәмгә, кунакларны каршыларга зурдан кубып әзерләнгән шырданлылар. Аларга күрше авыллар да ярдәм иткән. Сабан туен күрергә дип килгән Ачасыр авылы кызлары чишмәдә чиләкләр юа, Норлат авылы мәдәният йорты хезмәткәрләре музыкаль бизәлешне кайгырта, Акъегет авылыннан килгән кунаклар мәйданда булыша. Бәйрәм барысын да берләштергән. Бик кыска вакыт эчендә авыл уртасында ук зур гына «Чәй йорты» төзеп куйганнар. Зәвык белән эшләнгән бу җәйге кафе искиткеч матур. Анда безне 50 елдан артык умартачылык белән шөгыльләнүче Ринат абый Миңнуллинның яңа гына суырткан балы, Кече Шырданда гына җитештерелә торган экологик яктан чиста, сыйфатлы ризыклар белән сыйладылар (бу тырыш кешеләр турында газетабызның киләсе саннарында язарбыз). Махсус бренд булдырганнар. Шырдан эко-продукциясен киләчәктә туристларга да тәкъдим итәргә җыеналар.
Кече Шырдан бай тарихлы авыл, аның барлыкка килүе Болгар чорларына ук барып тоташа. Авыл кырыендагы изгеләр зиратында 14-15 йөзгә караган каберлекләр дә бар. Ул Татарстанның тарихи һәйкәлләр исемлегенә кертелгән. Кече Шырдан – галим, мәгърифәтче Каюм Насыйриның туган авылы. Авыл кечкенә булса да, аның киләчәге өметле.
– Кече Шырданда сугышта һәлак булганнар истәлегенә һәйкәл ачылды, аннары чишмәләрне төзекләндердек, былтыр Каюм Насыйри мәчетен яңарттык, – дип авыл белән ташытырды Олы Шырдан авылы башлыгы Рәис Кәримов.
Авылда күп эш иганәче – шушы авыл кешесе Асия Гобәйдуллина җитәкчелегендәге «Аквидук» оешмасы ярдәмендә башкарыла. Тиздән авылны туристик үзәккә әйләндерергә телиләр. Бай табигатьле, зур тарихы булган авылга тагын килергә, Каюм Насыйри эзләре буйлап урам урарга, Кече Шырданның кунакчыл, киң күңелле халкы белән кабат аралашырга язсын.
Яшел Үзән, Кече Шырдан
Кызыклы яңалыкларны күзәтеп бару өчен безнең МАХ каналына кушылыгыз.
Вход на сайт
Язмага реакция белдерегез
Мөһим
-
#Җәмгыять
Мәскәү базарында җәйнең иң мул чагы!
-
#Язмалар
«Бер әтидә мең шәхес»: Зиннур Хөснияр турында якыннары һәм танылган шәхесләр нәрсә сөйли?
-
#Кыскача яңалыклар
Татарстанда эт хуҗалары өчен яңа чикләүләр кертергә җыеналар: нәрсәләр үзгәрәчәк?
-
#Кыскача яңалыклар
Татарстанда иң зур яшьләр форумнарының берсе башлана: «Лига форум»га кемнәр килә?
-
#Кыскача яңалыклар
Табиблар могҗиза ясады: Казанда бер операция вакытында хатын-кыздан ике зур шешне алганнар
Комментарийлар
0
0
Бәйгедә катнашып, анда җиңү өчен бар авыл, район белән тырышлыгыбыз юкка булмады. Шул кадәр матур бәйрәм ясады безгә "Ш.К". Аллаһының рәхмәте яусын сезгә! Ачык, ягымлы журналистларыгыз, артистларның матур программасы бәйрәмебезне онытылмаслык итте. Сезгә иҗади уңышлар, тугыры укучылар теләп калабыз. Алла боерса алга таба да авылыбызда очрашырга насыйп булсын. Тагын бер кат Кече Шырданлылар, Яшел Үзән төбәге халкы исеменнән олы рәхмәтләребез сезгә! Сәбәп табып тагын килегез)))
0
0