Нәрсә? Кайда? Кайчан: Балалар яклау көнен ничек үткәрергә?

Казан мэриясе сайтында язылганча, бәйрәм Үзәк стадион янында 9.00 сәгатьтә башланачак, анда балалар өчен велосипед ярыш­лары уза. Спорт чаралары «Крылья Советов» паркында дәвам итәчәк. 10.00 сәгатьтән биредә футбол, мини-футбол, баскетбол уйнарга мөмкин булачак. Ә Горький паркында һәр теләгән кеше «Яшел марафон»да 10 һәм 4,2 км дистанцияне уза алачак. Спорт бәйрәме Урицкий паркында да узачак, биредә техник спорт төрләре буенча Ачык кубок оештырыла. Шунда ук 14.00 сәгатьтә яшь казанлыларны брейк-данс буенча баттл көтә.

14.00 сәгатьтә «Хезмәт резервлары» стадионында яшь футболчылар арасында «Күн туп» бөтенроссия ярышларының шәһәр этабы дәвам итәчәк. Музыка сөючеләр өчен 10.00 сәгатьтә Казан Кремле территориясендә рок-концерт һәм «Без Кремльне яратабыз» балалар фестивале узачак.

Балалар өчен бай эчтәлекле күңел ачу программасы Аксенов скверында, «Константиновка» мәдәният йортында, «Калейдоскоп» паркында, шулай ук Әмирхан проспектындагы 81нче, 83нче, 85нче йортлар һәм Чуйков урамындагы 37нче йорт ишегалларында да оештырыла.

Кремль яр буенда аниматорлар, мастер-класслар, өстәл уеннары, сабын куыклары һәм тәм-томнар әзерләнәчәк. Анда бәйрәм программасы 13.00 сәгатьтә башлана.

Шулай ук Горки-Әмәт урманында 10.00 сәгатьтән «Балачак» чемпионаты башлана, биредә балалар спорт ярышларында, мастер-класс­ларда, интерактив конкурсларда катнаша алачак.

Сәламәтлек мөмкинлекләре чикле балалар өчен дә күңел ачу чаралары әзерләнгән. 31 май көнне 10.00 сәгатьтә алар өчен Горки-Әмәт урманында «Бәхет белән куышу» дигән велойөреш узачак. Акция барышында балаларга велосипедларны бушлай биреп торачаклар.

Сүз уңаеннан, Бүгеннән Казан паркларында балалар церебраль паралич (ДЦП) диагнозы куелган балалар өчен велосипедлар барлыкка киләчәк. Транспорттан тулысынча бушлай файдаланырга мөмкин булачак. Махсус велосипедлар «Сосновая роща», Җиңү паркы, Урицкий паркларында, Горки-Әмәт урманында, «Крылья Советов» паркында, Кремль яр буенда барлыкка киләчәк.