Рөстәм Миңнеханов язгы кыр эшләре барышын контрольдә тотарга кушты

Берничә көннән Татарстанда язгы кыр эшләре башланачак. Быелгы чәчү мәйданы 2,9 млн гектар җирне тәшкил итә.
Чәчүлек мәйданнарның яртысыннан артыгын (55 процент) бөртекле культуралар алып тора. Республикада селекция үзәкләренең бары 84 бөртекле, кузаклы һәм ярма культуралары сортлары районлаштырылган, алар төбәкнең климат шартларына җайлашкан.

Язгы сабан ашлыгына кирәкле 345 мең тонна орлык складларда тупланган һәм заводларда бүгенге көндә 386 мең тонна бар, шул исәптән 77 мең тонна элиталы орлыклар.
Шикәр чөгендере, көнбагыш, кукуруз орлыкларын республика тулаем сатып ала. Барлыгы 7,3 мең тонна орлык сатып алырга кирәк. Шулардан 6100 тонна кукуруз, 600 тоннасы көнбагыш, 600 тоннасы рапс орлыгы. Моннан тыш, 80 мең чәчү берәмлеге шикәр чөгендере орлыгы да сатып алына.
Татарстанның авыл хуҗалыгы һәм азык-төлек министрының беренче урынбасары Николай Титов шәхси хуҗалыкларны бәрәңге симәнәсе белән тәэмин итү мәсьәләсенә дә игътибарлы булырга кирәк диде.

- Бәрәңге утырту мәйданнары шактый, 65 мең гектар, әмма уңыш түбән. Районнарда орлык яңартылмый. Кешеләр бәрәңге үстерүгә бик күп көч куя, нәтиҗә начар. Ә республикада сыйфатлы бәрәңге орлыгы җитәрлек, - ди ул.

Язгы чәчүгә исә техника яхшы әзерләнгән. Хәзерге вакытта ремонт эшләре төгәлләнгән, тракторларга сезонлы хезмәт күрсәтү, май һәм фильтрларын алыштыру бара. 600ләп трактор һәм 50ләп чәчкеч комплекс (620 берәмлектән) ремонтта әле.

Татарстан Республикасы Президенты Рөстәм Миңнеханов шулай ук ассызыклаганча, язгы кыр эшләрен уңышлы уздыру хуҗалыкларның әзрелегенә, әзерләнгән һәм тикшерелгән техникага, тармак хезмәткәрләрен кызыксындыруга бәйле. Бу мәсьәләне аерым контрольдә тотарга кирәк, диде ул, муниципаль районнар башлыкларына мөрәҗәгать итеп, язгы чәчү эшләрен сыйфатлы итеп һәм вакытында башкарырга кирәк.