Ял көнен ничек кызыклы итеп үткәрергә?

Якшәмбенең иң зур чарасы - "Балалар парады" бәйрәме. Бишенче тапкыр үткәрелүче әлеге гаилә фестивале Казансу яр буенда узачак. Оештыручылар сүзләре буенча, парадта яшь Казан гаиләләре балалары белән бергә катнашачак. Бәйрәм кысаларында "Балалар - балаларга" дип аталган хәйрия акциясе дә узачак. Чарадан кергән барлык акчалар Республика балалар клиник хастаханәсендә һәм "Роналд Макдоналд йорты"ндагы онкологик авырулардан дәваланучы балаларга тапшырылачак.

Фестиваль тарихында беренче тапкыр сәләтле гаиләләр катнашындагы ачык шәһәр бәйге-фестивале үткәреләчәк. Шулай ук кунакларны татар эстрадасының иң популяр артистлары катнашында концерт программасы, фотосессияләр, күңелле аттракционнар, аниматорлар, аквагрим һ.б. сюрпризлар көтә. Бәйрәмнең иң югары ноктасы - һавага очырылачак өч мең шар булачак, дип вәгъдә итә оештыручылар.

Казанның Горький исемендәге ял паркында беренче тапкыр тылсымчылар сәнгате фестивале узачак. Әлеге чарада кунаклар иң танылган иллюзия осталарының чыгышын гына карап калмыйча, тамашачыларга үзләренең сәләтләрен дә күрсәтә алачак. Керү - бушлай.

Вакыты: 13.00 сәгатьтә

«Казан ярминкәсе» күргәзмә үзәгенең беренче һәм икенче павильоннарында «Өй зоопаркы» дигән күргәзмә үтәчәк.

Килүчеләрне «Көмеш Ирбис 2016» дигән халыкара этләр, песиләр һәм декоратив күселәр күргәзмәсе, өйрәтелгән хайваннар чыгышы, тропик күбәләкләр паркы һәм тотып карый ала торган зоопарк көтә.

Бертуган Запашныйлар тәкъдим итүче шоу "Хис-кичерешләр һәм.." дип атала. Танылган цирк артистлары тамашачыларга мавыктыргыч, бик кызыклы номерларга бай программа тәкъдим итә. Өлкәннәр һәм балалар уссурия һәм ак тигрларны, африка арысланнарын, шулай ук Аскольд Запашныйның Гиннеслар рекордына кергән танылган сикерүен дә күрә алачак.

Быел Чаллы кунаклары тамашачыларны "Ак Барс" яшьләр үзәгендә "Казан куникуллары" дип аталган программа белән каршы алачак. Өлкәннәр һәм балалар каршында Ирбис һәм Зоя кушаматлы дельфиннар, Бәхетле һәм Дуся кушаматлы тимгелле тюленьнар, диңгез арысланы Жужа чыгыш ясаячак.