Әйдәгез, агач утыртырга!

Татарстанда 26 апрель - Урман утырту көне. Республиканың барлык муниципаль районнарында - урманнарда, ә шәһәрләрдә - парклар һәм скверларда шушы көнне массакүләм рәвештә яшь агачлар утыртылачак. Министрлар Кабинеты тарафыннан билгеләнгән әлеге чараларны оештыру Урман хуҗалыгы министрлыгына йөкләнгән. Казанда «яшел акция» Дәрвишләр бистәсендәге Каенлыкта, Кадыш бистәсе янында (җыелу урыны «Форт-Римэкс» автомобильләргә ягулык салу станциясе), Боровое Матюшино бистәсе урманында (җыелу урыны Казан-Боровое Матюшино-Песчаные Ковали-Мирный бистәсе - автомобиль юлы чаты) үткәрелә. Үсентеләрне утырту 10.00 сәгатьтә башлана. Урман хуҗалыгы министрлыгы республиканы яшелләндерергә теләүчеләрне 26 апрель көнне өмәләргә килергә чакыра.