Калфак чигү остасы: «Сабантуйларга заказлар күпләп килә»

Аның куллары чиккән калфаклар – чын сәнгать әсәрләре. Фәнзилә күңелендәге матурлыкка омтылыш һәм интернет челтәре ярдәменә таянып, китаплар ярдәмендә калфак тегү серләренә төшенгән.

– Беренче калфагымны «Хыял» ансамбленә тектем, – дип искә ала Фәнзилә апа. Шул вакыттан башлап, ул калфаклар тегү белән мавыгып китә. 
– Матурлыкны яратам, калфак минем өчен матурлык. Хәзер модага да керде ул. Үзем дә чараларга, театрга калфак киям. Татар хатын-кызында ул булырга тиеш дип уйлыйм. Халкыбызның элекке нигезен үстерү үзебездән тора, – ди Фәнзилә. 
Калфак тегү өчен остакул төрле материаллар куллана. Төп өлешен тулысынча фетрдан тегә, аннары аны бәрхет тукыма белән каплый. 

– Төрле материалдан тегеп була, җылы эчле өлге бар, шундый материалдан да тегәм, – ди Фәнзилә. Бисерлар, гәрәбәләр, пайеткалар, стразлар кулланып, калфакларны ялтыравыклы һәм үзенчәлекле итә. Пәрдә кисәкләреннән кисеп алынган арламентлар аның калфакларына аеруча зәвыкь бирә. Аның бар калфагы да кабатланмас, берсеннән-берсе матур, сокланып туймаслык. Фәнзилә өчен калфак тегү, аларны бизәү – ул хобби гына түгел, ә җан тынычлыгы.
– Эшли башласам, туктый алмыйм, бу минем өчен рәхәтлек, күңел тынычлыгы. Хатын-кыз ялтывык әйберне, матурлыкны ярата бит инде, миндә дә шул ук халәт. Алтын җеп белән чиккәндә, мулинә белән эшлим. Андый калфагымны җырчы, якташым Ләйсән Мәхмүтовага бүләк итттенм. Бөтен фантазиямне кушып, бирелеп эшлим. Калфак тегә торган бүлмәмнән чыгып китәсем дә килми. Калфак тегүгә бер көн вакыт китә, мин күбрәк кыш көне эшлим, Сабантуйларга заказлар күпләп килә, – ди ул. Аның киңәшләренә дә колау салыйк, калфакларны юарга кирәкми, аны скотч белән чистартырга кирәк ди остакул. Калфаклары белән аны күп җирләргә чакыралар. «Тылсым» исемле студиясе дә эшләп килә. 

Азалия Вәлиуллина