«Кызыгыз туса — куаныгыз»: Әтисен соңгы юлга озаткан кыз йөрәк сүзе

Яман шештән китте. Әни белән яратышып өйләнешсәләр дә, бик матур яшәсәләр дә, әтинең күңелен тырнаган нәрсә бар иде – ир баласы булмады. Әни кыз арты кыз тапкан шул. Бишебез дә әти дип өзелеп тордык үзенә. Икенче кызыбыз гел әти янында кайнашты. Үзе дә малайларчарак иде, әти дә аны улым дип йөртте. Гөлүсәбез ат өстеннән, бура башыннан төшмәде инде. Тирес түкте, печән чапты, урманга әти белән барып, агач екты дигәндәй.

Шуңа саулыгы да 30 яшендә ташка үлчәрлек кенә булып калды, гел авыр эшләп, кемнең яшәргәне, я булмаса авырудан терелгәне бар әле. Әти аны гел чирләргә яраткач, ныгысын ди иде. Ныгыды, ди! Ярый әле үзенә иптәшкә бер ир бала тапты. Шунсыз тормышы күңелле булмас иде сеңлемнең. Кияүгә чыкмады ул, саулыгы кияүгә ярарлык түгел. Калганнарыбыз һәммәбез дә тормышлы, балалы, дигәндәй. 

Әни дә эчтән генә сызды. Безгә ишеттермәсәләр дә әти әнине гел талады булса кирәк. Малай таба алмавына әни гаеплемени инде? Рәхмәт, безне какмыйча яратып кына үстерделәр. Тормышыбыз җитеш, бәхетле без, әти белән әнигә рәхмәттән ары сүз юк. 

Әти хаста түшәгенә егылгач кына аңлады, кызлы кеше иң бәхетлесе икән, диде. Күршеләрне күрә бит, ир балалары кайтып та басмыйлар, ә без атна саен чиратлашып әти белән әни янында. Рәхмәт, ирләребез дә үлеп тора, мунчага күтәреп кертәләр, юындыралар, сакал-мыекларын кыралар. Яшьлегемдә мин үземне картлык көнемдә нинди рәхәт көткәнен аңлап җиткермәгәнмен икән, диде берсендә. Әни елап җибәрде. Шунда гына аңладым, әнинең кыенсынып гомер иткәнен. Әти өчен без терәк, шуңа да кайткан саен рәхмәт укый, изге теләкләрен тели ул безгә.

Шуны әйтәсем килә, хөрмәтле әтиләр, кызыгыз туган саен куаныгыз гына, кыз бала ул бәхет ачкычы!

Әминә Сөләймәнова.

Яшел Үзән. 
Фото нейрочелтәр ярдәмендә әзерләнде