Нократ Аланында эшләп килүче “Кояш” ансамбле яңа елны яңа костюмнар белән каршылады

Нәкъ яңа ел каршыларга берничә көн кала, Казан шәһәреннән аларга яңа костюмнар җибәрелә. Әлеге костюмнар – Бөтендөнья татар конгрессының бүләге.
«26 декабрь көнне Казаннан шулкадәр матур костюмнар кайтты. Безнең ансамбль өчен зур бүләк булды ул. Моның өчен чит өлкәләрдә яшәүче татарларны берләштереп торучы Бөтендөнья татар конгрессына чиксез рәхмәтлебез. Күптәнге хыялыбыз тормышка ашты. Бу эш Киров өлкәсенең татар конгрессы аша башкарылды. Казаннан машина табып кайтартучы кеше дә Киров өлкәсе татар конгрессы җитәкчесе урынбасары Шәмсия ханым Хәлимова булды. Узган ел бездә 15нче Бөтенроссия авыл Сабан туе булган иде. Затлы костюмнарыбыз шушы Сабантуйның конгресстан бирелгән истәлекле бүләге. Безне милли костюмлы иткән һәркемгә без чиксез рәхмәтлебез. Яңа костюмнарыбыз белән тагын да шулай зур сәхнәләрдә чыгыш ясап, халкыбызга хезмәт итәргә язсын», - ди ансамбль җитәкчесе, Татарстанның атказанган мәдәният хезмәткәре Рәисә Миннебай кызы Мөхәммәтшина.