100 яшьлек Нәгыймулла бабайның озак яшәве төгәллектән һәм гәҗит укудан?!

Өлкән яшьтә булуына карамстан, ул ялгызы гына яши. Уллары һәм кызлары аның янына гел кайтып йөриләр. Без шалтыратканда Илдар исемле улы кайткан иде, әтине юындырып китәргә дип, мунча ягып йөрүем, ди ул.

Әтисенең озын гомерле булу серен Илдар абый аның төгәл кеше булуында күрә.

- Билгеле бер вакытта йокларга ята, билгеле бер вакытта тора. Озаклап йокларга яратмый. Әбәдне дә үз вакытында ашый. Ашау дигәннән, бер пешкән ризыкны икенче тапкыр ашарга яратмады. Гел хәрәкәттә булды. Әле дә ишегалларын себереп ала, карларын җиңелчә генә көри. Җәй буе бакчадан кермәде. Теплицасы бар. Яз көне кәлшәләр утыртыр өчен туфракны өйгә алып кереп куйган да инде. Февральдә помидор, борыч чәчә. Аларны күчереп утырта, тәрәзә төбендә үстерә. Бакчачылык эшен бик ярата. Умарталар да тотты, җитмеш биш яшенә кадәр ат та асрады. Җәй буе печәнен үзе чабып әзерли иде. Хезмәтне бик яратты, авылның оста балтачысы иде, - ди улы.

Йөзьяшәр Нәгыймулла бабай сугышта да катнашкан. Контузия алып, авылына кайткан. 1944 елда Нурлыгалимәгә өйләнә. Биш бала табып үстерәләр. Әбине моннан биш ел элек җирләгән.
Нәгыймулла бабай газета укырга ярата икән.

- Өстәле аның гел газета белән тулган булыр. Газеталар килми торса, юксына, нишләп китермәделәр икән дип шалтыратып сорап тора, - ди Илдар абый.

^{Фото: almet-rt.ru}