Газинур Морат: «Әллә сөеп горур булдык, башларны имәдек без»

Вакыт безне ваксытмады бугай,
Ачыкканда бирде икмәген.
Елмайтты да, елатты да еллар,
Тик барыбер елак итмәде.

Вакыт безне ваксытмады бугай,
Күшеккәндә бирде чикмәнен.
Какса - какты, сукса - сукты еллар,
Тик барыбер сукбай итмәде.

Вакыт алай ваксытмады бугай,
Иманага бирде Даланы.
Еллар безне иманасыз итте,
Тик имансыз итә алмады.

Вакыт безне ваксытмады бугай...

***
Әллә сөеп горур булдык,
Башларны имәдек без.
Өрмәгән урындыкларга
Утыртмам, димәдек без.

Тормыш кебек кырыс идек,
Әйттеләр: «Таш бәгырьле...»
Кадер эзләп киткән ярлар
Булды микән кадерле?

Бәхетләре булды микән,
Уңдылар микән ирдән?
Яшәмиме икән алар
Яшьлекне каргап-тиргәп?

Сөйдек. Нәфрәтләндек.
Ләкин
Башларны имәдек шул.
Өрмәгән урындыкларга
Утыртмам, димәдек шул.

Бүген менә сулык-сулык
Үксетәбез бәгырьне.
Кадер эзләп килгән ярлар
Чынлап микән кадерле?!