Күп күтәрмә, агайне! (Уены-чыны бергә)

Шулай булса да, энекәш яки сеңелкәшкә манный боткасы ашатканда, бер кашык аңа каптырсак, ике кашык үзебез каба идек. Инде үсеп җиткәч тә шул гадәт калды: тәмәкене көненә дүрт-бишне генә түгел, пачкалап тартабыз, сыра кружкалап  түгел, ә чиләге белән кирәк, градуслырагының исә мичкәсенә чумарга да әзер...

Хәер, сүзем ашау-эчү  турында түгел бит әле. Әлеге дә баягы, барысына да шул нәфес гаепле. Ә аның, үзегез беләсез, беркайчан да туясы юк!..
Кайсы өлкәне карасаң да шул ук хәл анысы: эштә  азрак эшләп күбрәк аласы килә. Ирләрнең күбесенә бер хатын гына җитми, ерак тарихта калган күп хатынлы чорларны сагыналар. Дөрес, матриархат чорына ук төшеп җитмиләр җитүен, чөнки ул чор ирләр файдасына түгел...
Акланырлык сәбәп тә бар: ирләр, холык-фигыльләре белән, аучылар икән. Ә аучы инде ул, үзегез беләсез, ауга чыкмыйча тора алмый...
Матриархат чорын сагынучы хатыннар да аз түгел, диярсез. Аларны да гаепләп булмый, чөнки хатын-кыз  -  хис кешесе. Хис акылдан алдарак йөри ягъни мәсәлән...

Гафу, азрак читкәрәк киттем бугай!
Акылны да әйтер идем, нәфескә бирелеп киткәндә: "Күп күтәрмә, агайне!" - дип кисәтсә, ни була инде...
Ашауның да катнашы бар, анысы. Элек хатыннарның күбесе миниатюрный булса, хәзер инде печән чүмәләсе хәтле. Хәер, ирләр дә алардан калышмый: күрешмичәрәк торсалар, зур корсакларына ишарәләп: "Бу синең ничә айлык?!" - дип төрттерәләр...

"Моңа, әлеге дә баягы, совет чоры гаепле: кем күпме күтәрә ала, шулчаклы урлый иде бит!" - дип акланыр кайберәүләр. Соң, җәмәгать, күтәрә алган кадәр генә алалар иде бит. Әле анда да алыр нәрсә булса гына!.. Хәтта ат, машина яки трактор белән кайтучылар да арба төбенә генә салып кайталар иде. Ә хәзер, әнә, миллионлап урлыйлар, әмма берни дә булмый: "Нецелевое использование",  - диләр дә, эшне ябып куялар.

Хәер, тагын читкәрәк киттем бугай. Гади халыкның андый мөмкинлеге юк. Аз гына урлаганны һичшиксез утыртып куялар. Азны бүлешеп булмый бит инде...
Ә инде халыкка, миллионлап урлаганнарга карап: "Күп күтәрмә, агайне!" - дип әйтергә генә кала…

Фото: ru.freepik.com