Турбулентлык зонасына эләккән самолетта булган Гөлназ Хәлфина: «Кем чукынып, кем «бисмилла» укып, үлемне каршыларга әзерләнгән идек» (ВИДЕО)

Тик кинәт... Турбулентлык зонасы башлана һәм очкыч эчендә кешеләр, сумкалар, ашамлыклар, хәтта утыргычлар оча башлый. Бер минутка якын вакыт эчендә 27 пассажир җәрәхәт ала, алар арасында Уфадан Гөлназ Хәлфина да була. Ул тормыш иптәше белән май бәйрәмнәрен диңгез буенда уздырырга планлаштыра.

- Болай буласын бөтенләй сизмәдек, очкыч тыныч кына барды. Миграция карточкаларын тутырып утырам, хәвефсезлек каешын эләктермәгән идем... Бервакыт самолет зур тизлек белән аска төшә башламасынмы?! Карыйм, кем чукына, кем "бисмилла" укый... Үлемне каршы алырга әзерләнә башладык. Мине кинәт өскә чөйде, башымны бәрдем һәм берникадәр ушыма килә алмый яттым. Уянуыма кулларым һәм борыным сынган иде. 20 минуттан самолет тыныч кына аэропортта утырды һәм безне "Ашыгыч ярдәм күрсәтү" табиблары каршы алды. Бангкок хастаханәсендә кул сөякләремне кисәкләрдән җыйдылар. Əлегә бернәрсә дә эшли алмыйм. Хәлем бераз яхшырса, бер атнадан Россиягә кайтарып җибәрергә тиешләр. Моңа кадәр дә очкычларга утырырга курка идем, моннан соң йөз кат уйлаячакмын, исән-сау туган ягыма гына кайтып җитим...