Раил Садриев: «Сез әле мине белмисез...»

- Мондый кичә уздыру идеясе беренче тапкыр Г. Камал театры сәхнәсендә Константин Райкинның моноспектаклен карагач туган иде. Аннан соң Беренче каналда шагыйрьләр турында цикл тәкъдим ителде. Шуның да тәэсире булды. Ә инде Сергей Безруковны караганнан соң мин шигъри кичәнең ничек булырга тиешлеген тәгаен күзалладым. Дөрес, бик икеләнеп кенә алындым бу эшкә. Хәтта репетиция ясауны да ахырга кадәр суза килдем. Шуңа күрә сәхнәдә кытыршылыклар, кимчеклекләр дә булгандыр. Халыкны 1,5 сәгать буена шигырь тыңлатып утыртып булырмы, аларны кабул итәрләрме, юкмы, дип шикләнгән идем, - диде ул безгә.

Әмма Раил әфәнденең шик-шөбһә, икеләнүләренә урын калмады - тамашачы шигъри спектакльне бик яратып кабул итте. Күңел нәкъ менә шундый кичәләргә сусаган икән бит. Габдулла Тукай, Муса Җәлил, Ркаил Зәйдулла, Илдар Юзеев, Әнгам Әтнабаев, Илдус Гыйләҗев, Эльмира Җәлилова, Гөлара Шәрипова һәм башкаларның туган тел, милләт язмышы, авыл, үлем, мәхәббәт турындагы фәлсәфи шигырьләрен тыңлаганда, кемдер тирән уйга батты, кемдер моңайды, кайсысыдыр ирен читеннән генә елмаеп куйды, ә кайберәүләрнең күзләре яшьләнде. Үлем турындагы өлешендә гыйбрәтле хикәят мисалында: «Бу тормыштан берәүнең дә исән чыкканы юк әле. Дөньядан бер генә нәрсәне дә үзебез белән алып китеп булмый. Шуңа күрә байлык артыннан гына куарга кирәкми» дигән фәлсәфи фикерен дә җиткерде Раил Садриев.

Сәхнәдә өч ел дәвамында тупланылган шигырьләрне тәкъдим иттек. Шуның биш-алтысы моңа кадәр төрле урыннарда сөйләнелгән иде. Калганнарын кичә өчен махсус ятладым. Шулай шигырьләр ятлый торган гадәтем бар минем. Текстны күз белән истә калдырам, - ди ул.

Кичәнең темалар күчеше вакытында сәхнәне җырчы Илфир Солтанов, скрипкачы Динә Закирова, Башкортстан кунаклары - бертуган Айдар һәм Алмаз Юнысовлар бизәде. Раил Садриев әйтүенчә, мондый әдәби-шигъри кичәләрнең дәвамы киләчәктә дә булачак.

Курка-курка гына алынгач, гадәттә, беренче коймак төерле була. Шуңа күрә киләчәктә моноспектакльне тагын да камилләштереп, кабат тәкъдим итү теләге бар, - ди ул.

^{Татар-информ}