Сталинның яраткан уенчыгын 40 миллионга саталар

_{фото: avito.ru}

Буа эшмәкәре Рафаил Шәйхетдинов бушлай игъланнар сайтына үз вакытында Иосиф Сталинның яраткан уенчыгы дигән исем алган беренче совет лимузины - «ЗИС-110» машинасын сатарга куйган. Бәясе - 40 миллион.

- Монда бернинди дә ялгышлык юк - төп-төгәл 40 миллион, - диде игълан астында күрсәтелгән телефон номеры хуҗасы Фәнил.
Машина хуҗасының шалтыратуларга җавап бирергә вакыты юк икән, шуңа да сөйләшүләр Фәнил аша бара. Аның сөйләвенчә, «ЗИС-110» машинасын Рафаил өч ел элек Волгоградтан сатып алган. Күпмегә икәнен әллә әйтергә теләмәде, әллә чынлап та белмиме - миндә андый мәгълүмат юк, дию белән чикләнде ул.
- Автомобиль белән кызыксынучылар бармы соң?
- Шалтыраталар. Әмма сатып алучылар түгел, күбесенчә журналистлар кызыксына.
- Ә сатылмаса?
- Бигрәк әйбәт, үзебездә калыр. Беренче максат ничек тә машинадан тизрәк котылу түгел бит безнең...
Игълан текстыннан аңлашылганча, «ЗИС» 4 999 чакрым юл үткән, эшләп чыгарылган елы - 1948, бензинда эшләүче двигатель күләме - 6 литр, төсе - кара. Куелган фотосыннан караганда, машина өр-яңа күренә.
Совет чорының иң матур автомобиленнән саналган «ЗИС-110» чын мәгънәсендә уникаль машина санала икән, чөнки мондый машиналар бары тик 2072 данә генә чыгарылган. Икенчедән, бу модельне эшләүдә бары тик үзебезнең совет белгечләре генә җәлеп ителгән.