71 яшендә дөнья чемпионатында җиңү яулаган Вагыйз Әхмеровка чит җирдә яңгыраган нинди сүз көч биргән?

Әйе, спорт ветераннары – самбо осталары җыенында көч сынаша якташыбыз. Илдәге сайлап алу ярышлары баскычларында икенче урынга күтәрелеп, әлеге чемпионатта катнашырга лаек була ул.
– Капабланкадагы уңышлы көрәшемне оныгым Даныйлга багышладым, – дип сөйли Вагыйз абый чит илдәге чыгышы турында. – Даныйл минем юлдан бара: көрәш белән шөгыльләнә. Дөрес, дзюдо көрәшен үз итә әлегә, сары пояс алды инде. Үсә төшкәч үзгәрүе мөмкин әле анысы. Иң мөһиме, спортны яратуы! Мин дә яшь чакта сөлге тотып бил алыша идем дә, армиядә самбога күчтем бит менә...

Хәрби хезмәттән кайткач, ул институтка укырга керә һәм шул ук вакытта спорт белән шөгыльләнүен дәвам итә. Ярышларда еш катнаша. Студент чагында ук СССРның спорт мастеры дәрәҗәсенә ирешә. Самбо көрәшенең шәһәребез һәм профсоюзларның «Хезмәт» спорт җәмгыяте беренчелекләре өчен барган ярышларда берничә тапкыр җиңеп, подиумның иң өске баскычына менү бәхете дә тәти аңа.

Яшь чагындагы уңышларын искә төшерүгә, өйрәтүче-тренерларын искә ала ул. Үзенең остазлары – бертуган Мадьяровлар булуы белән горурлана Вагыйз абый. Атаклы Мадьяровлар мәктәбендә тәрбия алган спортчылар арасында бик күп җиңүләр яулап дан тотучылар ишле.
Вагыйз абый тагын бер үзенчәлекле таяныч – дуслык турында аерым сөйләде.
Бергә үскән, бергә укыган һәм тормышта да үзара ярдәмләшеп яшәгән иптәше Гаяз Исламовны зур хөрмәт белән искә алды ул. Рухи таяныч ди ул үзләренең дуслыгын. Көрәшче катнашкан һәр ярышка йөри икән җанатар. Ерак чит илдә булуына карамастан, әлеге чемпионатка да барган якташы.
– Гел ят телләр гөрләгән залда кисәк кенә нәкъ үзебезчә: «Вагыйз, бирешмә – ә!!!» – дип кычкырган тавыш ишеткәч, чын-чынлап көч өстәлгәндәй була, – ди көрәшче.
Чит җирдә якташлык-дуслыкның әһәмияте аеруча зур шул.

Ә менә дөнья чемпионатында катнашырлык саулыкка ничек ирешкән соң ул? 71 яшьтәге якташыбызның сәламәтлеге көнләшерлек әйбәт икәнлеген дә күрсәтә ич әлеге җиңү.

– Спорт ул – даими шөгыльләнү дигән сүз. Егетләр белән көнаралаш «Батыр» спорт үзәгенә йөри идем, хәзер «Ак Барс»ныкына барам. Бу яшькә җитеп сәламәтлектән зарланмавым да шул спортка бәйле инде. Олыгайгач, аның әһәмияте бермә-бер арта. Спорт белән даими шөгыльләнсәң, тазалыгың да саклана ич. Мин үземнең яшьтәгеләргә, саулыгыгызга куана белегез, дияр идем. Рекорд куярга ашкынмасаң да ярый, рекорд – башкада. Әйтик, хәзер кыш чаңгыда йөрергә табигать үзе үк чакыра безне. Мин үзем һәркөн чаңгыда чыгам. Ун чакрым араны йөреп кайткач, беләсезме, шулхәтле җиңел, шулхәтле рәхәт миңа – ярышта җиңгән кебек сөенәм, билләһи!
Әйе, тормыш мәшәкатьләренә, һәм, әлбәттә, гап-гади ялкаулыкка бирешмәү – үзе үк зур җиңү. Аның бүләге – сәламәтлек! Дөнья беренчелегендә көрәшеп көмеш медаль алган 71 яшьтәге якташыбыз Вагыйз Әхмеров сау-сәламәт булуы белән дә бәхетле.

Ильяс САЛИХҖАН