#Язмалар 30 октябрь 2017, 13:10

Алимент түләмәүчеләргә җәза катгыйлана

30 октябрь 2017, 13:10

Дәүләт Думасы депутатлары соңгы өченче укылышта Административ хокук бозулар кодексына төзәтмәләр кертү турындагы законны кабул итте. Әлеге закон нигезендә, суд приставлары алимент түләмәүчеләрне мөстәкыйль рәвештә тоткарларга һәм административ хокук бозу турында протокол төзү урынына илтеп кую хокукына ия булачак.

Скопировать ссылку

Закон проекты авторлары приставларның хокукларын арттыруны бурычлы кешеләрнең чакырган вакытта килмәүләре, ә аларны мәҗбүриләп китерергә приставларның хокуклары булмау белән аңлата. Моңа кадәр проблема полиция хезмәткәрләре булышлыгы белән хәл ителгән. Ләкин ул өстәмә чыгымнар сорый һәм административ җаваплылыкка тарту процедурасын катлауландыра.

Әти яки әни кеше балигълык яшенә җитмәгән баласына, яисә балигъ булган балалар хезмәткә яраксыз әти-әнисенә алимент түләмәгән очракта, закон буенча 15 тәүлеккә кадәр административ кулга алу яки 20 мең сумга кадәр штраф каралган. Әгәр дә шуннан соң да алимент түләмәсә, тагын да катгыйрак җәза көтә: бу очракта инде андыйларны җинаять җаваплылыгына тартырга, хәтта бер елга кадәр ирекләреннән мәхрүм итәргә мөмкиннәр.

Кызыклы яңалыкларны күзәтеп бару өчен безнең МАХ каналына кушылыгыз.