Алимент түләмәүчеләрнең 20 проценты хатын-кызлар

Татарстан баш суд приставының урынбасары Елена Варфоломеева әйтүенчә, мондый онлайн кабул итүләр халык өчен бик җайлы. Чират көтәсе юк, вакыт минутлап бүленгән.

– Яңа форматта 30дан артык кешене кабул иттек. Бурычны вакытында түләмәүчеләр үзләре дә мөрәҗәгать итте. Кайберләре алимент суммасы белән килешми, башка сораулар буенча да кызыксыналар. Оператив рәвештә эшләү нәтиҗәсендә, бер алимент түләмәүче хатын-кызның рәсми рәвештә эшләве ачыкланды, кемгәдер җинаять эше ачылды, машинасына арест салынды, – ди Елена Варфоломеева.

Татарстанда алимент түләмәүчеләр 20 меңгә якын. Аларның 10-20 проценты хатын-кызлар. Ел башыннан суд приставлары бурычлы кешеләрдән 116 миллион сумлык алиментны кире кайтара алган. Бу былтырның өч ае белән чагыштырганда 44 миллион сумга күбрәк. Бурычны кайтару өчен барлык чаралар да кулланыла: чит илгә чыгуны чиклиләр, электрон ысул аша исәп счетларыннан акча тотып калына, милек белән бәйле чикләүләр кулланыла.
Суд приставына сораулар 8843 514-92-21 телефоны аша кабул ителә.