Алсу Газыймҗанова 2024 ел хакында: «Яңа эшләр башламагыз»

Авырулар
Ел саен диярлек авырулар, вируслар хакында сораганда, Алсу алар үзгәрәчәк, мутацияләнәчәк, дип фаразлады. Короновирус хакында сөйләшүләр бетәчәк, ул гадәти грипп кебек халык арасында калачак, дигән фаразларын да җиткергән иде. 

- Авырулар хакында үзгәрешләр, мутацияләр булачак, дигән идем. Ул коронавирус кебек булмаячак, әлбәттә. Әмма, гадәти грипп кебек, массакүләм авырулар булачак. Без моны инде хәзер үк күзәтәбез. Тик күп үлемнәргә сәбәп булган авырулар булмаячак. Бер елны биргән интервьюда мин кешеләрнең прививкалардан баш тартуы онытылган авыруларның кабат арабызга кайтуына сәбәп булачак, дигән идем инде. Бума ютәл, кызамык кебек авырулар бетәргә тиеш кебек иде. Без инде җиңдек дип уйлаган авырулар баш калкытырга мөмкин, - ди Алсу. 

Гаилә
Куян йорт хайваны, гаилә кору өчен яхшы ел, диде узып баручы ел хакында әңгәмәдешебез. 2024 ел кәбисә елы һәм ул елны гаилә корырга, гадәттә, киңәш ителми. 

- Киләсе ел ниндидер эшләрне дәвам итү өчен яхшы. Мисалга, әгәр дә егет белән кыз очраша икән, гаилә кору өчен аларга уңай ел булачак. Әмма глобаль, яңа эшләргә, зур проектларга тотынырга кирәкми, - дип киңәш итте Алсу ханым. 

Акча
Һәр кешене дә Яңа ел алдыннан булган акчаны югалтмамынмы, акча үзгәрмәсме, дигән сорау борчый. 
- Елдан-ел тормыш авырлаша һәм фаразлар ясап, кешеләрне шатландыру да кыенлаша бара. Әле авырулар, әле ниндидер хәрби конфликтлар, тагын нәрсәләрдер килеп чыгып тора... Болардан, әлбәттә инде, кешеләрнең акчалары артмый һәм әлеге вакыйгалар гади кеше тормышында чагылыш таба. Бу шулай дәвам итәчәк тә. Хезмәт хакларын күтәрмәячәкләр. Ниндидер үзгәреш булып, бар да яхшы булачак дия алмыйм. 

Киресенчә, елдан-ел бар да начарлана. Эшләүче кешеләр кими, халык саны арта. Кешеләргә хезмәт хакы түләү мөмкинлекләре кими. Бу өлкәдә яхшыга үзгәрешләр күрмим.

Торак, күчемсез милеккә килсәк, мин һәрвакыт акчагызны торак алуга тотыгыз, дип киңәш итә идем. Тиз акча эшләү өчен пирамидаларга кергәнче, торактан да яхшысы юк, дип әйттем. Хәзер бернәрсә дә әйтә алмыйм. Гади кешегә кертемнәр ясарга мөмкинлекләр калмады да. Бәяләр  нык артты. Ул бәяләр нигезләнмәгән. Торак базары җимереләчәк, - дип фаразлый экстрасенс. 

Табигый бәла-казалар
Узган елгы фаразларында Алсу табигатьтә су күбәячәк, су басулар, су белән бәйле казалар күп күрәм, дип фаразлаган иде. 
- Киләсе елда да су күп булачак. Климат үзгәрә. Әлбәттә инде катаклизмалар да, җир тетрәүләр дә булачак, - диде Алсу. 

Медицина
"Медицина өлкәсендә уникаль операцияләр була дигән идем. Алга таба да зур ачышлар көтелә. Миңа нишләптер очлыклар үстерәчәкләр дигән мәгълүмат килә. Яңалыклар органнар, буыннар үстерү, органнар күчереп утырту белән бәйле булыр төсле", - дип фаразлады әңгәмәдәшебез 2023 елга. 
Киләсе елда органнарны үстерү буенча ачышлар булачак, ди ул. Шулай ук баш мие белән бәйле зур ачышлар булачак, дип тә өстәде. 
Алсу Газыймҗанова инде берничә ел яман шешкә каршы дәвалау чаралары инде күптән уйлап табылган, ул әле халыкка чыгарылмаган гына, ди. 
Хәтер яхшырту белән бәйле ачышлар да ясалуы бар. 

- Ничек кенә булмасын, без табигатьне алдый алмаячакбыз, нәрсә генә уйлап тапсак та. Әмма озак дәвалану таләп иткән, дәвалап булмый торган авыруларны тизрәк дәвалый башлаячаклар, - дигән фикердә ул. 

МХО
- Башкача була алмый, махсус хәрби операция тәмамланачак. Мин үзем дә моңа ышанам, - диде күпләрнең күңелен тырнаган сорауга җавап биреп Алсу Газыймҗанова. 

Сәясәт
Киләсе елда безне сайлаулар көтә. 
- Сәясәттә зур үзгәрешләр булачак. Кискен үзгәрешләр көтелә. Алар яхшы якка булыр дип өметләнәсе килә. Кем өчендер ул үзгәрешләр бөтенләй дә көтелмәгән булуы ихтимал. Вакыт күрсәтер ,- ди Алсу. - Гомумән алганда, ел чагыштырмача тыныч, кискен үзгәрешләрсез, булыр кебек. 
"Өченче Бөтендөнья сугышы булырмы” дигән сорауга мин ел саен юк, быел булмый, дип килдем. Әмма бар нәрсә дә Израильдән башланачак, дия идем. Андагы вакыйгаларны бераз туктатып торырлар, бәлки. Әмма ул туктамаячак. Конфликт үсәчәк кенә. Әлегә тыныч булачак. Тик ул безгә дә кагылмый калмый,- дип фаразларын җиткерде Алсу Газыймҗанова киләсе елга.