Авыр планшет, аз хезмәт хакы, ялсыз эш...

Ул вакытларда җанисәпче кәгазьне кулдан тутырган булса, хәзер барлык мәгълүматлар махсус планшетларда саклана. Димәк, эшләр күпкә җиңеләйгән. Быелгы Бөтенроссия халык санын алу турында җанисәпче Артур Шәрәфетдинов белән сөйләшеп алдык. Берничә тапкыр чигерелгән әлеге чара тәмамланырга да 4 кенә көн калды.

Артурның һөнәре буенча шәхси "Simple Architecture" проект остаханәсендә коммерция директоры һәм Казан төзелеш көллиятеедә махсус фәннәр укытучысы икәнен белгәч, җанисәпче булу ник кирәк булды икән, дигән сорау туды. Ул бу эшкә көллиятнең директор урынбасары үтенечен тыңлап алынган. Чөнки эше буенча заказ бирүчеләр, төзүчеләр белән күп эшли, микрорайоннарны проектлаштырганда, торак-коммуналь хуҗалык җитәкчеләре белән төрле җыелышлар уздыра икән.

Кыскасы, кешеләр белән ничек аралашырга икәнне белә, шуңа күрә ишек ачучылар сорауларына бик теләп җавап биргән. Бер кеше белән аралашуга аның 3-5 минуты китсә, күп дигәндә, бер фатирда 15-20 минут тоткарланган.

- Бер көн эчендә бик күп йортларны йөреп чыгарга була. Подъезд эченә эләгү, аларны өйдә тоту гына авыррак. Кайберләре “Госуслуги” порталы аша узганын әйтә, – ди ул. Аның сүзләренчә, планшет эшне җиңеләйтсә дә, күтәреп йөрергә авыр икән.

Артур җанисәпче булып, беренче һәм соңгы тапкыр эшләгәнен дә әйтте. “Бу эш өчен узган вакыт белән вәгъдә ителгән хезмәт хакы берничек тә туры килми. Проектлаштыручы буларак, мин 3 тапкыр күбрәк хезмәт хакы алган булыр идем”, – диде әңгәмәдәшем.

Динара Әхмәт