Айдар Галимов оныгының фотосурәтен күрсәтте!

Фото астына җырчының концертларда яратып сөйләгән сүзләре язылган: "Оныгым туганнан соң бер танышымны очраттым, ул: “Хәзер җырчы, депутат статусларың төшеп кала, син хәзер – картәти”, - диде. Чынлап та, кадерле статус икән ул", - диелгән.

Сафиягә әле 1 яшь һәм 8 ай. Биергә бик ярата икән. Нинди генә көй ишетмәсен, шундук биергә керешә ди. Айфон, планшет кебек техниканы картәтисенә караганда да яхшырак белә. Быел Кыш Бабай кызчыкка бик күп уенчыклар һәм матур күлмәк алып килгән. Ə картәтисе, кайда барса да, Сафияга күз явын алырлык киемнәр алып кайта.

Айдар Галимов оныгы турында интервьюларда да еш сөйли.
- Сафия туганын хәбәр иткәндә мин стадионда, футбол карый идем. Шулкадәр сөендем, 0:3 җиңелеп килгәнебезне дә оныттым хәтта. Балалар табу йортының баш табибы рөхсәтен алып, Гүзәл һәм Сафия янына шул көнне үк палатага кердек.

Ул вакытта әти дәваханәдә, Уфада иде. Икенче көнгә аның янына бардым да: “Әти, мин дә картәти булдым бит”, - дидем. Бер нәрсә дә дәшмәде. Карыйм, күзенә яшь тулды. Бу яңалыкны үзенчә шулай кабул итүе булгандыр.