Баздан бәрәңге чыгармадыгызмы әле?

Ирексездән бу темага кагылышлы хатирәләрем белән бүлешәсем килеп китте.

Кемдә ничек, безнең гаиләдә бәрәңге чыгару май бәйрәмнәренә туры килә иде. Берничә көн ял булганга, шулай  туры китергәннәрдер инде аны.  1 май илебездә  "Мир! Труд! Май!" булса, күп кенә район-авылларда күкәй җыю, күкәй бәйрәме дә бит әле. Кечкенәдән бу бәйрәм минем өчен икеяклы булып истә калган. Беренчесе – күңелле, аллы-гөлле төсләргә буялган күкәй җыю, өләшү булса, икенчесе – баздан бәрәңге чыгару көне.

...Иртән әти мәрхүмнең: "Кызым, тор әйдә, әнә, синең өчен тавыклар нинди матур күкәй салганнар!" – дип, ятак янына суган кабыгы салып буялган, нык матур күкәйләр тотып килгәнен мәңге онытасым юк. Үсә төшкәч, күкәйгә генә алданмый башладык ахры, башкачарак уята башладылар. "Төне буе йөрисез дә, арт шәрифегезгә кояш төшкәнче йоклыйсыз, башка чыкты юк сезгә, клубка!" - дигән “авыр артиллерия” көченә килә иде. Ах шушы сүзләәр... Яшь чак, клубка да чыгасы килә бит, юрганны аяк белән өстән тибеп төшереп, җенләнә-җенләнә торып китүдән башка чара калмый иде.

Әни мәрхүмә ясаган, бетнек кушылган сөтле чәйне чөперә-чөперә эчә идек тә, өй астына (ясты) төшеп чума идек. Анда инде кичтән, әни тарафыннан әзерләнеп куйган 4 чиләк: "Төштегезме, матурларым?" - дигән сыман каршы ала. Бер чиләккә – эре, икенчесенә – утырту, өченчесенә – вак, дүртенчесенә вак чебеннәр, тәмле исләр чыгарып ятучы черегән бәрәңге салына. Шушылай чүгәләп утырып (тураеп булмый, чөнки ясты тутырык бәрәңге ), теге йокыдан торгандагы җеннәр дә тиз юкка чыга торганнар иде.  Ә иң рәхәте, иң тәмлесе бәрәңге дүрт өлешкә бүленеп, мунча өйалдына, я булмаса абзарга күчеп беткәндә, ясты почмагында калган, чыгарга дип үз чиратын көткән бер чиләк бәрәңгене, Берлинны алган сыман хисләр белән тутыруы!

Ахырга җиткәндә, куллар, бармаклар да җәтрәк селкенә, йөри башлый иде әле. Кырык тапкыр чәй эчәргә менеп йөрүләр юк, төш вакытында, шахтадан чыккан сыман өскә баш калкытсак, чәйләп-ашлап алгач, "күк капусы" (ясты капкачы) тагы ачыла иде. Бу көнне кич, рөхсәтсез-нисез клубка чыга идек (мин, дөресрәге).

Кыскасы, бәрәңгене чыгармадык әле. Теләсәгез, 1 майда чыгарырбыз. Аннан кичен клубка... 😄

Дулкыния Гаянова