Бер көн эшләмәсәң күбрәк эшләнә, яки дүрт көнлек эш атнасына күчәбезмени?

Әлеге идеяны сораштыруларда катнашучыларның бары тик 26 проценты гына хуплаган. Дүрт көнлеккә күчү яклы булган хатын-кызлар ир-атларга караганда ике тапкыр күбрәк. Ә 24 яшькә хәтле булганнар әлеге идеяны бик өнәп бетермәгән. Яшьләрнең эшкә омтылышы булуы бераз шатландыра, билгеле, эше генә булсын. Дүрт көнлек эш атнасы ир-атларга да, хатын-кызларга да комачауламый дип санаучылар – 30 процент.

Президент постында Медведев булганда ук эш атнасын кыскарту турында сүз булган иде. Ул чагында аны тиз арада гына була торган хәл түгел, әмма бөтенләй үк булмаслык та түгел дигән иделәр. Хезмәт хаклары элеккечә сакланып, эш сәгатьләре озайтылмыйча дип тә ышандырдылар. Әмма россиялеләр әлеге үзгәрешкә шикләнеп карый, сәбәбе – әлеге дә баягы хезмәт хаклары кимү ихтималы. Җәмәгатьчелек фикерен өйрәнү үзәге җитәкчесе Валерий Федоров сүзләренчә, безнең халык буш вакытны цивилизацияле уздыру дәрәҗәсенә үсеп җитмәгән, аларга эш кирәк һәм ул яхшы түләнә торган булсын. Халыкның күпчелеге атнада бер эш көненең югалуы аркасында хезмәт хакы 20 процентка хәтле кимергә мөмкин дип уйлый. Урта һәм кече эшмәкәрлек вәкилләренең дә 80 проценты мондый үзгәрешләргә каршы. Буш вакытны цивилизацияле үткәрергә өйрәнгәнчегә хәтле рәхәтләнеп биш көн эшлибез әлегә.

Дәүләт Думасы депутаты Геннадий Онищенко ял көнен арттыру алкоголизмның үсүенә китерәчәк дип белдергән. Кайберәүләр ял итүне кәгеп алып кәефләнеп йөрү дип кенә аңлаганга, пәнҗешәмбе көнне үк эчә башлап, җомга көнне өстәп, шимбә-якшәмбедә әлеге халәттән чыгачак дип уйлый Онищенко. Ул хәзер дә шулай, бары тик айну вакыты гына кыскарак. 

Дүрт көнлеккә күчкәнче буш вакытны матур һәм файдалы уздыру индустриясен ныклап аякка бастырырга кирәк. Ул кайбер регионнарда бөтенләй үсеш алмаган, үсеш алганнарында акрын темплар белән бара, яки артык күп чыгымнар сорый. Халыкның күпчелеге барыбер эшсез тора алмый, чөнки аягын озынрак юрганга карап сузасы килә. Хәзер дә, мөмкинлеге булганда, күпләр берничә урында эшли. Ә тагын бер буш көне була икән, әлбәттә, ул нәрсә дә булса эшләячәк. Әллә кайчаннан бирле җәя башлаган балкон идәнен булса да җәя ул, йә булмаса гаражында казынып ятачак, тимер өемен бер урыннан икенче урынга күчереп. Ял итү өчен түгел, ә тагын берәр эшеңне эшләр өчен эш атнасын бер көнгә кыскартсалар бер дә начар булмас иде кебек. Рәхәтләнеп эшләр иде адәм баласы. Авыл кешесе кебек. Авылда бит халык бер эшне эшләп бетереп, рәхәтләнеп ял итәр өчен түгел, ә икенче бер эшне дә эшләп өлегерәсе бар дип тырыша. Ә ял иткән арада утын булса да кисеп ала... Тагын бер көн кирәк, озын юрганга чамалап аяк сузу өчен...