Чаллы егете Фәнис Хөснетдинов «Давай поженимся!» тапшыруында кәләш тапты

Мәхәббәт эзләргә Фәнис Мөслимдә яшәүче әнисе белән килде. Ә Роза Сябитова белән Лариса Гузеева татар халкының милли ризыгы – чәк-чәк белән сыйландылар.

Фәнискә 32 яшь. Кладовщик булып эшли, буш вакытында мәҗлесләр алып бара. Үз фатиры да бар. Киләчәктә иганәчелек фонды ачарга хыяллана. Үз акчасын теләсә нәрсәгә туздырмый, банктагы акчасын санап, барлап тора. Сары чәчле, зәңгәр күзле, тырыш кәләш эзли. Моңа кадәр ике тапкыр бәхетен сынап караган, ләкин уңышсыз. Киләчәктә гаиләсендә ким дигәндә өч бала булуын телим ди.

Фәнис белән танышырга өч гүзәл, сөйкемле кәләш – Адыгеядән бию тренеры София, Мәскәүдән башлангыч сыйныф укытучысы Ульяна, Казаннан 20 яшьлек инглиз һәм татар теленнән репетитор Рәйсә килгән иде. Кызлар барысы да чибәр, Фәнис исә Рәйсәне сайлады. Кыяфәте буенча да ул аның хыялына туры килеп тора, саф татар телендә сөйләшүе, гореф-гадәтләрне белеп, хөрмәт итүе белән Рәйсә Фәнисне таң калдырды. Сәхнәдә дә алар пар күренде: кәләш такмаклар җырлады, егет гармунда аңа көйләде.

Без Фәниснең тапшыруда катнашуы, Рәйсә белән нинди мөнәсәбәтләрдә калуын белер өчен хәбәргә чыктык. Тапшыруга Фәнисне социаль челтәрләрдән күреп чакырып алганнар икән:

– Мине бик яхшы каршы алдылар, команда да үз эшен оста башкара. Ә сәхнә артында позитив мохит иде. Тапшыруны тиз арада төшердек, кызык мизгелләр дә булды, – ди ул.

Лариса Гузеева һәм Роза Сябитова белән аралашу турында да әйтеп китте.
– Алар белән рәхәтләнеп аралаштык. Барысын ничек бар, шулай сөйләдем, бәлки әзрәк аңлашылмаучанлыклар да булгандыр, ләкин бу минем өчен зур тәҗрибә, – ди егет.

Ә менә Рәйсәне Фәнис чибәрлеге белән җәлеп иткән. Холкы да үзенә туры килеп тора:
– Зәңгәр күзле, сары чәчле матур кыз. Нәкъ мин эзләгәнчә. Акыллы, аралашучан, максатчан булуы да зур роль уйнады. Хәзерге вакытта Рәйсә белән дусларча мөнәсәбәтләрдә. Аңа бик сокланам, – ди ул.

Тапшырудан соң Фәнисне Чаллыда таный башлаганнар. “Көн дә бер кеше тапшыру турында килеп сораштыра. Фотога да төшәргә сорыйлар”, – ди ул.

Рәйсә Абдуллина белән дә аралашып алдык. Аны тапшыруга үзләре чакырып алганнар, видеодан сөйләшеп кастинг узган. “Яңа тәҗрибә алырга мин каршы түгел идем”, – ди ул.

Фәнис турында беренче фикерләре белән дә бүлеште.
– Ул иҗади, акыллы егет! Аның белән сөйләшергә кызык. Әмма романтик планда мин аралашу эзләмим, шуңа күрә бу яктан аны гомумән күзләмәдем, – ди.

Ләкин дусларча аралашырга һәм Чаллыга кунакка кайтырга Рәйсә каршы түгел.
Рәйсә тапшыруда такмаклар җырлады, бу аның өчен дулкынландыргыч мизгел булган:

– Музыка мәктәбен кызыл дипломга тәмамласам да, җырлый белмим. Әмма үземә ышаныч булышты! Мин булдырам дидем дә, чыгып җырладым, – дип хисләре белән бүлеште.

Тапшыруда катнашкан башка кәләшләр белән дә Рәйсә яхшы мөнәсәбәтләрдә калган. Хәтта тапшыруда танышкан кыз янына кунакка барырга да планлаштыра икән:

– София һәм Ульяна белән беренче минутлардан ук уртак тел таптык. Һаман да «невестки» дигән чатта аралашабыз. Шушы арада Ульянага кунакка Питерга барырга җыенам, – дип сөйләде ул. 

Ә безгә яшьләргә киләчәктә үз парларын табып, бәхетле гаилә корырга язсын дип теләргә генә кала!

Залинә Гыйлаҗиева.