Эльза Хөснетдинова: «Хөкүмәт хәзер кече бизнесны үстерүдә ярдәм итә, чөнки кайчан да булса ул урта бизнеска әйләнәчәк»

Узган ел 433 республика проекты бәйгедә катнашкан, шуларның 83е Россия Президенты тарафыннан хупланган. 2017 елда, гомумән, һәр бишенче оешма дәүләт ярдәме алган.
 
– Узган ел Татарстан Президент грантлары системасында актив катнашкан иде. Бу республикада проблемаларын башкалар чишкәнен көтмәгән, үз идеяләрен үзләре тормышка ашырырга теләүче халык яши, дигәнне аңлата.  Минем монда килүемнең төп максаты – халыкка грант алу өчен нәрсә эшләргә кирәк икәнең аңлату. Кешеләр ни өчен кемдер җиңә, кемдер җиңелә икәнен белергә тиеш. Грантка гаризалар тапшырганда җитешсезлекләр китмәсен өчен дә үткәрелә бу чара, – диде Илья Чукалин.

Быел Президент Грантлары өчен дәүләттән 8 миллиард сум акча бүлеп бирелгән. Бу акчаларның 80 проценттан артыгы төбәкләргә китәчәк. Татарстанга социаль проектларын тормышка ашыру өчен 140 миллион сум акча бирәчәкләр.

Федераль белгеч белән очрашуга 400гә якын социаль проектлар җитәкчеләре килгән иде. Араларында балалар, мөмкинлекләре чиклеләр өчен булдырылган проектлар да, мәдәниятне, телне саклап калу өлкәсендә эшләүчеләр дә бар иде. Россия мөселман эшмәкәрләр ассоциациясенең эшмәкәрлек белән шөгыльләнә башлаучыларга ярдәм үзәге оештыручыларының берсе Эльза Хөснетдинова да Президент Гранты программасы белән кызыксынып килгән. Аларның оешмалары эшмәкәр булырга теләүчеләр өчен ике айга бер уза торган ике көнлек бушлай семинарлар үткәрә.

– Без кешедә эшмәкәрлек алдында булган курку хисен бетерергә булышабыз, башлангыч белем бирәбез. Хатын-кызлар өчен беренче лекторийны гыйнвар аенда оештырдык. Кызлар анда психология, эшлекле киенү стиле үзенчәлекләрен, ислам икътисады, бухгалтерияне алып бару, салымнар системасы, хокук, социаль челтәрләр, дипломатия серләрен өйрәнде. Шушы ике көннең дә нәтиҗәсе булды. Өйдә, үзләре өчен генә эшләүче кызлар эшмәкәр буларак теркәлде, салым түли башлады. Күбесе документ тутыру, салым системасыннан курыкмый башлады. Хөкүмәт хәзер кече бизнесны үстерүдә ярдәм итә, чөнки кайчан да булса ул урта бизнеска әйләнәчәк, күп кешене эшле итәчәк. Лекторийларда катнашу өчен эшмәкәр булу мәҗбүри түгел, – ди Эльза Хөснетдинова.

Социаль проектлар өчен Президент грантлары системасы инде 2006 елдан бирле эшли.