Гүзәл Сәгыйтова: “Халык биюгә сусаган икән”

- Туган телләр һәм халыклар бердәмлеге елында башлаган эшне дәвам итәбез. «Хәрәкәттә – бәрәкәт» проектын мәктәпләрдә сынадык, ул бик уңышлы үтте. Халык биюгә сусаган икән. Хәрәкәтләр аша татар мәдәниятенә кызыксыну уятабыз. Проект аерым катламнарга түгел, бөтен халыкка юнәлтелгән. Алга таба да шундый чаралар оештырасым килә. Үзем биергә оялсам да, халыкның кыю булуына сокланам, - диде Казан Башкарма комитеты җитәкчесенең социаль мәсьәләләр буенча урынбасары Гүзәл Сәгыйтова.

«Ярмәк вагы» биюе Самара өлкәсенең Ярмәк авылында барлыкка килгән. Әлеге биюнең тарихына күз салсак, ул бик үзенчәлекле сынау-уен нәтиҗәсендә килеп чыккан. 18 яшьләре тулган яшь егетләр үкчәләре белән аяк асларыннан уза торган камчыга басарга тиеш булган. Элек «Ярмәк вагы»н егетләр генә биесә, тора-бара уенга кызлар да кушылган. Бию вак хәрәкәтләре, ритмлы, дәртле булуы белән дә аерылып тора.
- Рекрутларны армия сафларына алганда “Ярмәк” биегәннәр. Аякка чыбыркы белән сукканнар, ә егетләр аны тотып калырга тиеш булган, шул рәвешле тыпырдау килеп чыккан. Хәзерге вакытта бию Самара өлкәсендә әле сакланып калган, без дә чыгышларыбызда аны яратып башкарабыз. Бүген биюнең төп хәрәкәтләрен халыкка өйрәттек. Алар арасында да осталар күп, - диде Татарстан Дәүләт җыр һәм бию ансамбленең балет артисты Владислав Уткин.

“Ярмәк вагы” казанлылар күңеленә май булып ятты. Олысы, кечесе кулга-кул тотынышып, Кабан күле буенда шау-гөр килде. Ике сәгатькә якын бер туктаусыз биюләр, күз ачып йомганчы тәмамланды. Халык шулкадәр дәртләнде ки, хәтта таралырга да теләмәде. Мондый чаралар кич утыру, аулак өй мәҗлесләренә тартым, катнашучылар үзләрен туганнар, якын дуслар кебек хис итә. Беренче каймак яхшы булды, икенчесе дә тиздән табадан төшәчәк. 15 июньдә Камал театры артистлары Кабан күле янында степ биюен өйрәтәчәкләр. Килми калмагыз!