Яу кырында яңгырыйдыр бер дәртле җыр

Гомер озын да һәм, ни кызганыч, бик кыска да булырга мөмкин. Ләкин, кеше шул кыска гына гомерендә дә атылган йолдыз кебек якты эз калдыра ала. Балык Бистәсе районының Балтач авылындагы Гөлүсә белән Фәнил Шакировларның улы Камил моңа ачык мисал.

Шәһитләрнең урыны җәннәттә

Балтач авылы мәдәният йорты директоры Алсу Вафина белән сәнгать җитәкчесе Фидания Сөниева махсус хәрби операциядә катнашучылар хөрмәтенә һәм махсус хәрби операциядә һәлак булган Камил Шакиров истәлегенә әдәби-музыкаль кичә әзерләгән. Җиңүнең 80 еллыгына һәм 2025 ел – Ватан сакчысы елына багышланган әлеге чара авылның имам-хатыйбы Фердинант Хәкимовның Коръән укуы белән башланды. Кичәне мәдәният хезмәткәре Гөлия Кәримуллина матур итеп алып барды.

– Ватан өчен яу кырында һәлак булганнар – шәһитләр. Аллаһы Тәгалә “шәһитләрнең  урыны җәннәттә булыр” дигән. Балтач халкы гуманитар ярдәм җыюда катнаша, хатын-кызлар саклану челтәрләре үрә. Мондагы тыныч тормышыбыз өчен без махсус хәрби операциядә катнашучыларга бурычлы, аларга һәм гаиләләренә тагын да активрак ярдәм итик, – диде имам-хатыйп.

Балтач авылы зиратына махсус хәрби операциянең 3 шәһите җирләнгән: Рәсүл Вафин, Марс Мостафин һәм Камил Шакиров.

Балачак хатирәләре

Беренче укытучысы Диләрә Сәлахиева:”Камил үзенең тәвәккәллеге белән яшьтәшләреннән аерылып торды”, – диде. Сыйныфташлары истәлекләр сөйләде. Камил кечкенәдән үк техникага һәвәс була. Берсендә иптәшләре белән җыелышып, мотоциклда йөрергә исәплиләр.

– “Әтинең мотоциклы ишегалдында тик ята. Әйдәгез, шуны кабызабыз”, – диде Камил. Өлкән шоферларның, тракторчыларның техникага су салганнарын күргән бар иде. Без дә мотоциклга су салдык. Кабынмый гына бит, төзәтәбез, дип бөтен мотоциклны сүтеп бетерә яздык. Суның ягулык итеп түгел, ә радиаторга салынганын кем белгән ул чакта, – дип сөйләде сыйныфташлары.

Рульгә әле буе да җитмәгән Камилнең әтисенең машинасын кабызып алып чыгып китеп, кырларны урап кайтуына авылдашлары шаккаткан иде. Туганнары Гөлсирин белән Фидаил Шакировлар, ике туганы Лилия Шакирова, күршеләре Илфир Гыйләҗев Камилнең ярдәмчел һәм туган җанлы булганлыгын искә төшерделәр.

Бүләккә – дүрт кызчык

– Махсус хәрби операция башлангач, Камил:”Мин дә барам. Ватанны мин дә якламасам, кем яклар?!”– диде. Аның һәлак булганлыгына һаман ышанасым килми. “Җимеш”, дип кенә дәшә торган иде. Миңа дүрт кызыбызны бүләк итеп бакыйлыкка күчте. Камил җырларга яратты, бергә яшәгән еллар җыр булып калды, – диде хатыны Әдилә Шакирова.

Балтач җирле үзидарәсе рәисе Нияз Гарипов:” Камил Шакиров – авылыбызның горурлыгы. Ватанга тугъры ул тәрбияләп үстергәннәре өчен Фәнил белән Гөлүсәгә рәхмәт! Ватан сугышы ветераннары кебек махсус хәрби операциядә һәлак булганнарны да онытмабыз, аларның даны мәңгелек”, – диде.

Яу кырыннан кайтаваз

Шагыйрь-волонтер Рүзәл Минһаҗевның үзенең иҗатташлары белән кичәдә катнашуы эчтәлекне тагын да баетты.

– Гуманитар ярдәм төяп, махсус хәрби операция зонасына күп тапкыр бардым инде, шуның тугызында Камил Шакиров белән очраштым. Ул миңа хәрбиләрне табып, исемле “посылкаларны” тапшырырга булыша иде. Окопта яки берәр бинада җырлашып утыра идек, башкалар тыңлый. Моңсулык, төшенкелек халәте булмады анда. Ватанга, туган җиргә мәхәббәт белән сугарылган җырларны башлап җибәрә иде. Татар тән чисталыгын ярата, Камил дә ташландык өйне мунча итеп ясаган иде. Камил Шакиров татар милләтенең батыр улы ул. Яраланган дистәләгән хәрбине яу кырыннан алып чыккан. Берсендә яралы хәрбинең автоматы онытылып калганлыгы билгеле була. Снарядлар шартлавына, пилотсыз очу аппаратларының һөҗүменә карамастан, Камил машинасын борып, кире китә, онытылган автоматны барып ала. Ни кызганыч, һөҗүмнәрнең берсендә Камил Шакиров һәлак була, – дип сөйләде Рүзәл Минһаҗев.

Ул махсус хәрби операциядә катнашучы хәрбиләрдән Камил турындагы фикерләрен дә видеотасмага яздырып алып кайткан. Хәрбиләрнең һәркайсы Камил Шакировның кыю, тәвәккәл һәм иң мөһиме – ватанпәрвәр кеше булганлыгын искәртте. “Авыр мизгелләрдә җыр сузып яки кояштай елмаеп килеп, безнең рухны күтәреп җибәрә иде. Камил Шакиров курку белмичә һөҗүмнәргә ташланды, безгә үрнәк булды. ”, – дип, юксынып сөйләде хәрбиләр.

Җыр – юаныч

Нәселләре белән җырга-моңга гашыйк Шакировлар. Видеоязмалардан Камил үзе дә җырлады. Кичәдә әтисе Фәнил, туганы Фидаил Шакировлар җыр сузды. Концерт программасы кысаларында Рүзәл Минһаҗев, Рәсимә Гарифуллина, Халидин Әхәтов, Рәмис Әскаров, Гөлсинә Камусина, Эльвина Хафизова, Амелия Павлова, Гөлфия Нургалиева, Сәмил Гобәй, Марсель Нотфуллин чыгыш ясады.