Исем күлмәк түгел – тузмый

Бала безгә Аллаһ бүләге. Ул матурмы-ямьсезме, озын буйлымы-кыскамы, кара чәчле, кара күзлеме, сары чәчле, зәңгәр күзлеме – аны сайлап ала алмыйбыз.

Ә исемне инде үзебез сайлыйбыз, бала шул исем белән гомер юлын үтә. Балага мәгънәле исем кушарга кирәк дигәнгә үпкәләргә кирәкмәстер дә бәлки. Теге дөньяга күчкәч тә, безгә догалар колагыбызга азан әйтеп мулла кушкан исемебез һәм атабызның исеме белән килеп ирешәчәк, Алла боерса. Кыямәт көнендә дә без мәхшәр мәйданына үз исемебез һәм атабызның исеме белән чакырылачакбыз. Балага Аллаһ каршында исеме өчен оялырлык булмасын иде, дип тырыша бит Җәлил хәзрәт.

Ә исемне безнең татар кадәр төрләндергән башка халык юктыр да ул.

Элек исемне мәгънәсенә карап кушканнар. Тик икешәр-өчәр катлы итеп, аннан кыскартканнар. Миңнемулла булса – Минни, Хәлиулла булса – Хайла, Әхмәдулла – Әхми, Мөхлисулла – Мөкис, Миңкамал – Миңки, Гайшәбикә – Гайши. Нигә кирәк булган инде хатын-кыз исеменә – бану-бикәләр, ирләр исеменә етдин-бетдиннәр өстәү? Берәр хикмәте булгандыр инде, күрәсең.

Революциядән соң тулы ирек булган инде исем кушарга, ниндине телисең! Трактор да, Комбайн да, Октябрина да, Ноябрина да. Вил, Ким, Мэлслар да. Аннан инде чит илдән дә: француз, алман, инглиз, итальяннан дисеңме? Ә башка халыкта юк бит бу!

Динне бетереп, халыкның мең еллар буена сакланып килгән традицияләренең тамырына балта чабылды. Шөкер, мең шөкер, яшьләребез дингә килә, намазга баса, хәләл-хәрамны аера. Балаларына исемнең дә мәгънәлесен сайларлар, Алла боерса.

Илләребез, көннәребез тыныч булсын да, ул кара көннәр яңадан әйләнеп кенә кайтмасын инде, берүк.

Рәйсә Галимуллина, Кукмара районы, Мәмәшир авылы.