Кая ул Краснодар чәйләре, кая ул 36нчы номер чәйләр?

Өйрәндек инде бөтенесенә дә. Барын-югын белмидер, әлбә тели күңелем дигәндәй, миңа теге замандагы сәйлүн-һинд чәйләрен бирегез дип утыра алмыйсың. Кая ул Краснодар чәйләре, кая ул 36нчы номер чәйләр? Алары юк. Бөтенесе шул йә сәйлүн, йә һинд чәе. Тик менә чын һинд һәм сәйлүн чәен пешерсәң, хуш исләре урамга кадәр чыга торган иде. Ә хәзер кайсын гына пешерсәң дә, хуш исе юк.

Теге грузиннан сораганнар бит әле, коньякның өч йолдызлысы биш йолдызлысыннан нәрсә белән аерыла дип. Грузин: "Не знаю дорогой, всё из одной бочки наливаем", – дип әйткән ди. Шуның шикелле, монда да шулайдыр инде, тартма тышындагы язу гына аерыладыр, мөгаен.

Ярар, эчәбез инде, Аллаһка шөкер, авыз ияләнгән, без әбиләр булсак та, әле бик борынгы заман әбиләре түгел. Вәйт ул заман әбиләре беләдерие чәйнең тәмен.  Бигрәк тә минем Саҗидә әнием белән сеңлесе Һәдияттә. Мәрҗән җиңги: “Ваһап әнкәйгә әйбәт чәй алып кайтса, Саҗидәттә белән Һәдияттә шул арада килеп җитәләр иде", – дип көлдерә торган иде. Ә бит әни Югары очта, Һәдияттә Яңа урамда, Ваһап абзыйлар Түбән очта яшәделәр. Менә бит ул чактагы чәйнең хуш исе каян кая кадәр килеп җиткән.

Ваһап абзый – әниләрнең кече энеләре. Хәзер ул нигездә Ваһап абзыйның оныгы Фоат белән Лилия яшиләр.

Җәмәгать, ул такта чәй эчкән заман бит әле. Чәйне пресслап, такталап, фольга белән төреп чыгаралар иде. Өч төрле сорт: высший, первый, второй. Әбиләр шуның кызыл кәгазьлесен, аның да юка такталысын сайлап алалар иде, юка такталысы әйбәт прессланган була икән. Менә имәндә икән чикләвек.