Казан халкы: “Ярминкәләр Яңа елдан соң да булсын иде...”

Бу быелгы көзге ярминкәләрнең йомгаклау сәүдәсе иде, шунлыктан халык аеруча күп булды. Товар да мулдан: чатырлардагы өстәлләрдә ит һәм ит продуктлары, яшелчәләр һәм бакча җимешләре, сөт һәм сөт ризыклары, ипи һәм кондитер әйберләре өелеп тора.
- Монда якташларым – мөслимлеләр сәүдә итми, ләкин ярминкәгә чыксам, туган ягым Мөслим авыллары күз алдыма килә. Ярминкәгә чыга алмый калган шимбәләрдә күңел “китек” кала, җанга нәрсәдер җитмәгән кебек була. Балтачның – ипие, Буаның – ат казылыгы, Сабаның – сөте, Югары Осланның җиләк-җимешләре тәмле, гел сатып алам. Ярминкәләр Яңа ел бәйрәмнәреннән соң да дәвам итсен иде. Авыл халкына бик рәхмәтле булып, тагын килүләрен көтеп калам, - ди Россиянең атказанган, Татарстанның халык артисты Зөфәр Харисов.

Арча районында туып-үскән Гөлнур ханым Шәйдуллина, мөгаен, абыстайдыр? Ул бик үтемле итеп сөйләп, авыл халкы,  республика җитәкчелеге исәнлегенә дога да кылып өлгерде.
- Ходай авылларга һәм агропредприятиеләргә киләсе елда да мул уңышлар бирсен иде. Ярминкәләр оештырганнары өчен республика җитәкчелегенә дә чын күңелдән рәхмәт! Җаның ни тели – ярминкәдә шул бар. Яңа елда да ярминкәләр үткәрелсен иде, - диде Гөлнур Шәйдуллина.

Мин булган ярминкәдәге бәяләр:
Ат ите (килограммнарда) - 650 сум,
Сыер ите - 450 сумнан башлап,
Он - 30 сум,
Шикәр комы - 60 сум,
Бәрәңге - 23сум,
Суган - 25 сум,
Кишер - 23сум,
Сарымсак - 300 сум,
Сөт (литры) - 45 сум, 
Йомырка (дистәсе) - 75-80 сум.