#Язмалар 12 ноябрь 2018, 13:02

Казанның 3 миллиончы туристы туен Казанда үткәрергә җыена

12 ноябрь 2018, 13:02

Казанга Татарстанның өч миллионынчы туристы – 25 яшьлек Мәскәү кызы Дарья Чепур килде. Аны аэропортта Казан мэры Илсур Метшин каршы алды. Кунакның сүзләре буенча, шундый җылы кабул итү аның өчен көтелмәгән хәл булган. Илсур Метшин аны Казан белән дә таныштырган.

Скопировать ссылку

Казанның 3 миллиончы туристы туен Казанда үткәрергә җыена

– Сезнең килү безнең өчен көтелгән, тарихи вакыйга. Туризм өлкәсен үстерүгә күп көч куябыз, соңгы ун елда туристлар саны биш тапкыр артты, – дип сөйләде мэр. – 3 млн күп түгел кебек, ләкин без 500 меңнән башладык. Казанның меңьеллыгы вакытында 470 мең турист килгән иде. Ә бүген, әле ел тәмамланмаган, 3 миллионынчы туристны сәламлибез.
Очрашу азагында Илсур Метшин Дарья Чепурга Казан формасында сувенир бүләк итте.
– Бу безнең Гаилә үзәге бинасы. Егетегез белән гаиләгезне биредә төзүегезне телибез. Гаилә казаныгыз сәламәтлек һәм бәхет белән тулып торсын. Сез хәзер безнең шәһәребез тарихына кереп калдыгыз, – диде ул.

Дарья шәһәребезне бик ошаткан, хәтта ул үзенең туен Казанда үткәрергә карар кылган. Аның Казанга сәфәренең сәбәбе дә булачак иренең Казанда яшәүче әбисе белән танышу икән.
Кунак кызының ике көнлек программасы бик тыгыз иде. Ул төрле экскурсияләрдә йөрергә, музейда булырга, Камал театрында спектакль карарга, вертолетта очарга, татар милли ризыклары пешерү буенча мастер-классларда катнашырга, аквапаркта да ял итәргә өлгерде.

Сүз уңаеннан: бер миллион турист чиген Казан 2010 елда узды. 2015 елда Татарстан башкаласында ике миллионнан артык турист булган, 2017 елда – 2 млн 750 мең. Гыйнвардан августка кадәр Казанга 2 млн 650 мең турист килгән.

Фото: kzn.ru

Кызыклы яңалыкларны күзәтеп бару өчен Т елеграмга кушылыгыз.

#өч миллионынчы турист #Дарья Чепур