«Көне буе бик каты эчем пошты, төнлә дә йоклый алмадым. Икенче тапкыр янды...»

Янгын чыккан төндә энесе өйдә булган. Аллаһның рәхмәте белән, Казаннан машинасы белән кайтып бара торган кеше төтен чыкканын күреп алып туктаган, койма аша сикереп, өйнең хуҗасын уяткан. 
– Энем каты итеп дөбердәткән тавышка уянган. Ишекне ачса, анда ялкын ди. Шул арада кашлары, чәчләре янып чыккан. Тиз генә йөгереп барып, тәрәзә аша сикергән. Күршесе миңа шалтыратты. Ул көнне көне буе бик каты эчем пошты, төнлә дә йоклый алмадым. Энеңнең йорты яна дигәч, анда киттем. Аяклар йөрми, үзем куркудан калтырыйм, авызлар кибеп бетте, исән генә булсын инде дип юл буе тәкрарлап бардым. Барып җиттем, трусиктан гына басып тора энем. Шөкер, чыгып өлгергән, дип тынычландым. Үзең исән, башкасы булыр, дидем. Аның икенче тапкыр шулай сыналуы,  – ди Сәлимә апа.  

Энесе, пенсиягә чыкканчы, Ханты-Мансийскидагы Пыть-Ях шәһәрендә яшәгән. Анда торганда да шундый ук каза күргән, малайлары ут белән шаярып, йортлары янып беткән.
– Азат “Газпром”да гомер буе машина йөртүче булып эшләде. Алтын куллы, эшчән иде. Абруе зур булды. Хуҗалары хөрмәт итте үзен. Өйне торгызырга эшеннән бик ярдәм иттеләр. Пенсиягә чыккач, биш ел элек, гаиләсеннән аерылып, монда кайтты. Йорт сатып алды, аны яңартты, яңа мебельләр алып куйды. Пенсиядә булса да, тик тормый, бригада белән эшләп йөри. Азмы-күпме җыйган акчасы да бар иде, насыйп булмаган инде үзенә. Ярый өен иминиятләштергән булган. Бүген шуның артыннан йөрдек. Бер документ кына җитми, диделәр. Ут кыска ялганыштан чыккан, дип аңлаттылар. Энем бик акыллы, төпле, тырыш. Күршеләренә генә булышып тора, нинди йомышлары булса да, тыңлый, күндәм үзе, – ди Сәлимә апа. 

Шушы изге көннәрдә Азат Газимовка без дә кулдан килгән кадәр ярдәм итсәк иде. Сәлимә Ганифанидованың банк картасы 89872855807 телефон номерына (Сбербанк) беркетелгән.