Коронавирус белән авыручылар саны булмаган алты гына район калган

Нибары алты район гына әлегә “чиста” санала. Болар - Кама Тамагы, Балык Бистәсе, Әлки, Зәй, Минзәлә, Мөслим. Роспотребнадзорның Татарстан буенча идарәсе җитәкчесе Марина Патяшина сүзләренчә, соңгы ун көндә сигез районда: Әтнә, Чирмешән, Кайбыч, Югары Ослан, Спас, Апас, Ютазы, Актанышта яңа авыру очраклары ачыкланган. Иң күп вирус эләктерүчеләр - Теләчедә, Чүпрәледә, Лаеш, Әтнә, Питрәч, Биектау, Балтач, Тәтеш, Саба, Буада.

Бүгенге көндә республикада 7 647 кеше ике атналык карантинда утыра. Аларның 252се – чит илдән кайтучылар, 5 635е - башка төбәкләрдән килүчеләр, 1760ы – коронавируска шикле кешеләр белән контактта булучылар.

Авырулар гына түгел, үзчикләнү режимын бозу очраклары да арта. Бүгенге көнгә хокук саклаучылар 19 мең 508 беркетмә төзегән. Бер көндә генә дә 841 кеше штрафка тартылган. Беркетмәләр битлексез йөргән, үзчикләнү режимын бозган һәм эш бирүчедән ялган белешмә алган өчен төзелгән. Балалары ялгызы гына урамда йөргән өчен 403 әти-әнигә карата да административ протокол төзергә өлгергәннәр. 32 кеше коронавирус турында ялган хәбәр тараткан өчен штрафка тартылган. Карантинда утырырга тиеш булып та, бу режимны бозган 68 кеше тотылган.

Ил башлыгы Владимир Путин 12 майдан үзчикләнү режимыннан акрынлап чыга башлау турында хәбәр иткән иде. Әлеге уңайдан республика үз планын әзерли. Марина Патяшина әйтүенчә, ул планның проекты бар инде.

- Соңгы көннәрдә коронавирус белән авыручыларның саны 7-8 процентка артып бара. Атна буе бу сан 4-6 процентны тәшкил итсә, кайбер өлкәләрнең эшчәнлеген яңартып булыр иде, -диде ул.

Аныңча, бу шулай ук 9 май бәйрәмнәрендә күзәтеләчәк вазгыятьтән дә тора.