#Язмалар 19 июнь 2020, 15:59

Коронавирус чигенә, ләкин, китмәде әле

19 июнь 2020, 15:59

Татарстан буенча Распотребнадзор идарәсе җитәкчесе урынбасары Любовь Авдонина белән республиканың сәламәтлек саклау министры урынбасары-Казан шәһәренең сәламәтлек саклау идарәсе җитәкчесе Владимир Жаворонков 19 июньдә “Татар-информ” мәгълүмат агентлыгында узган матбугат конференциясендә Татарстанда хәзерге санитар-эпидемиологик хәл белән таныштырдылар.

Скопировать ссылку

Саннар артында-язмышлар

Любовь Авдонина сөйләгәнчә, Татарстанда пандемия башланганнан бирле 4 мең 114 кеше коронавирус йоктырган. Узган тәүлектә тагын 36 очрак теркәлгән. Авыручыларның 22 проценты - пенсионерлар, ә 4 проценты укучы - балалар.
- Шөкер, 2 мең 969 кеше сәламәтләнде инде. Ләкин, сырхауханәдәге 55 кеше әлегә авыр хәлдә. Коронавирус таралу 0,8 процентны гына тәшкил итә. Әмма тынычланырга иртәрәк, республикада үзбикләнү режимы гамәлдә, - дип искәртте санитар табиб Любовь Авдонина.- Татарстанда үзбикләнү режимын йомшартуның беренче этабы бара. Санитар күрсәткечләр 2 нче этапка күченү мөмкинлеге бирә. Шулай да әле санитар-эпидемиологик хәл 1 июльгә кадәр күзәтеп торылачак.

Сәүдә үзәкләре 3 нче этапта гына кабат эшли башлаячак. “Сәнәгать товарлары кибетләренең кайчан ачылачагын әлегә төгәл әйтеп булмый, 3 нче этапта санитар хәлләргә карап эш йөртеләчәк”, - диде санитар табиб.

Икенче “дулкын” килерме?

Кытайда коронавирусның инде икенче дулкыны башлануы турында хәбәрләр килеп иреште. Татарстан әлеге беренчесе белән көрәшә. Владимир Жаворонков ышандырганча, сырхауханәләрдә дәвалау шартлары тудырылган.
- Казанда 13 августка йогышлы авырулар сырхауханәсенә тагын бер корпус төзеп тапшырыла. Табиблар фидакарь рәвештә эшли. Кызганыч, 80 медицина хезмәткәре дә коронавирус йоктырды. Казанда коронавирусның кискен таралышы, шулай ук 4 айда үлүчеләрнең кискен артуы күзәтелми, - диде Владимир Жаворонков.

- Без хәзер икенче дулкынга беренчесенә караганда да яхшырак әзерлектә. Коронавирус белән бер авырган кешенең тагын авырырга мөмкинме әллә юкмы икәнлеген тәгаен әйтеп булмый әле, - дип өстәде Любовь Авдонина.

Сабантуй кайгысы түгел

Татарстан авылларында 4 июльдә Сабан туйлары үткәрелүе ихтимал, дигән сүзләр йөри. Шушы мәсьәләдә кызыксынып сорау бирдем.
- Республиканың 14 районында коронавирус белән авыручылар республиканың уртача күрсәткеченнән югарырак. Сабантуй санитар хәл тотрыклырак районнарда үткәрелер, мөгаен. Ләкин, калган районнарда да Сабантуй оештыру санитар-эпидемиологик хәлгә карап билгеләнәчәк. Әлегә бернинди кара юк, вакыт якынлашкач, санитар хәл күрсәтер, - дип җавап кайтарды Любовь Авдонина.

Иреккә очарга иртәрәк

Любовь Авдонина белән Владимир Жаворонков республикада әле үзбикләнү режимы гамәлдә булганлыгын кат-кат искәрттеләр. Җәмәгать транспортында, шулай ук таксида медицина битлегеннән һәм перчаткандан булу зарур. “Шәхси автомобильдә барганда битлек кию мәҗбүри түгел”, - диде Любовь Авдонина. Татарстаннан башка төбәкләргә чыгу, өлкән яшьтәге туганнарга бару, чит илләргә туристлык сәяхәтенә китү киңәш ителми. Кулларны яхшылап юу, антисептиклар куллану зарур.

Кызыклы яңалыкларны күзәтеп бару өчен безнең МАХ каналына кушылыгыз.

#Казан коронавирус