“Күркәне дәвалаганчы, чирләтмәү хәерлерәк”

Мисал өчен, Лаеш районы Комлы Ковал авылында яшәүче Нигъмәтҗановлар. Шунысы кызык: Руслан да, Елена да шәһәр балалары һәм белемнәре буенча да авыл хуҗалыгы өлкәсенә бернинди дә катнашлары юк. Елена – һөнәре буенча юрист, ә гаилә башлыгы исә икътисадчы.
- Шәһәр кешеләре булуга карамастан, безне һәрвакыт авыл хуҗалыгы җәлеп итте, дөрес туклану да кызыксындырды. Шәһәр эчендә кечкенә генә җир кишәрлегебез бар иде. Моннан 15 еллар чамасы элек без шул кишәрлектә кәҗә, сарык, куян асрадык, тавык, үрдәк, бытбылдык кебек кош-корт үрчетеп, хобби кебек кенә шөгыльләндек, - ди Елена ханым.

Авыл хуҗалыгы тармагына чын-чынлап алар 2018 елда кереп китә. Руслан “Кәүсәр” кооперативын төзүчеләрнең берсе була. Шунда алар кошчылык, күркәләрне үстерү, тәрбияләүнең асылына төшенә, белемнәрен арттыра.
Башта бер тәүлекле 300 баш күркәдән башланган эш хәзер аена 1 мең башка җиткерелгән.

- 2019 елда районда күркә итен сатучылар юклыгына игътибар иттек. Ә бу ит бик файдалы, бигрәк тә аллергиядән интеккән кешеләргә һәм балаларга файдасы күп. Без үзебезнең өйдә дә хәзер күркә итен генә кулланабыз, - ди хуҗабикә.
Һәр эшнең җае булган кебек, күркә үстерүнең дә үз серләре бар.

- Күркә авырса, аны дәвалауның мәгънәсе юклыгын аңладык. Шуңа да аларны сәламәт итеп үстерү күпкә отышлырак. Моның өчен аларга инфекция һәм пычрак кертмәскә кирәк. Күркәләр билгеле бер зурлыкка җиткәнче, алар янына аерым өс һәм аяк киеме белән керәбез. Дезинфекцияли торган келәмнәр тора. Кошларны аерым, махсус алар өчен әзерләнгән рецепт буенча гына тукландырабыз. Балансланган ризык кошларга бертөрле итеп үсәргә мөмкинлек бирә, - ди Елена.

Пандемия Нигъмәтҗановларга кагылмаган да, диярлек.
- Үзбикләнү вакытында безнең керем артты гына. Шуңа да бизнеска бик зыян килде димәс идем. Беренче көннәрне аеруча да халык продукцияне бик күп алды. Бәйрәмгә әзерләнгән кебек. Күрәсең, башта көтелмәгән ял көннәре кебегрәк кабул иткән булганнардыр. Аннан бар да үз хәленә кайтты. Бездә барлыгы дүрт кеше эшли, шуларның икесе сату нокталарында. Бәхеткә, район җитәкчелеге Илдус Зарипов безгә бик булышты. Безнең бизнеста кооперация дә зур ярдәм күрсәтә, - ди бу өлкәдә эшчәнлекләрен үстерү өчен барлык мөмкинлекләрдән дә файдаланган Нигъмәтҗановлар.

Лилия ЛОКМАНОВА.