"Куркабыз": 174нче мәктәпкә йөрүче балалар саны кимегән

“Бу вакыйгадан соң мәктәпкә йөрүче балалар саны кимеде, әлбәттә. Ата-аналар курка. Бу хакта алар безгә - сыйныф җитәкчеләренә хәбәр итә. Без аларны “укырга килегез” дип берничек тә мәҗбүр итә алмыйбыз. Мәктәп ягыннан да, Гадәттән тыш хәлләр министрлыгыннан да ярдәм күрсәтелә. Мәсәлән, кичә укучылар белән инструктаж үткәрдек. Балаларның психологик халәтен күзәтәбез һәм күзәтәчәкбез”, - диде 174нче мәктәпнең директор урынбасары Резидә Харисова.

Аның сөйләвенчә, 174нче мәктәп укучылары арасында да психологик ярдәмгә мохтаҗ балалар булган. “Мин үзем бишенче сыйныфны җитәклим. Бер укучым: “Мин куркам, подъездга да газ балончингы белән генә керәм”, - дигәч аның әти-әнисе белән дә, психолог белән дә сөйләштем. Киңәшләрне җиткердем”, - диде Резидә ханым.

“175нче мәктәп укучылары белән безнең мәктәп укучылары үзара бик дус иде. Һәрберебезнең анда танышлары, дуслары бар. Мәктәп психологының кызы шундый укый. Ул каты яраланмады, әлегә өйдә”, - дип сөйләде безгә Резидә Харисова.

174нче мәктәптә металл эзләү җайланмасы, магнит төймә, вахта пунктында кисәтү төймәсе, периметр буенча 7 видеокамера, мәктәп эчендә исә 11 камера урнаштырылган. Мәктәпне иртәнге сәгать 7дән кичке сәгать 8гә кадәр хосусый сак предприятиесе сакчысы саклый. Аның хезмәте бюджеттан тыш акчадан түләнә.