Лилия Ярмөхәммәтова: «Уенчык бәйләп сатудан керем бар-барын, әмма кеше бәяләрдән куркып кала»

– Баш хисапчы булып эшләдем. Ике ел элек оешмабызның лицензиясен алдылар, сәламәтлегем белән дә проблемалар туды. Шуңа да тулысынча уенчыклар бәйләп сатуга күчтем. Февраль аенда үзмәшгуль буларак теркәлдем һәм хәзер инде рәсми рәвештә, курыкмыйча эшли алам, – ди оста.

Лилия ханымның уенчыкларын ярминкәләрдә, социаль челтәрдәге шәхси сәхифәсендә һәм үзе кебек оста куллар өчен ясалган «Осталар ярминкәсе» сайтында сатып алыр­га була.

– Сәхифәләрне, сайтларны өйрәнергә кирәк. Шул рәвешле генә товарны сатып алучыга җиткерергә була. Әзер уенчыкларым да, заказга бәйләгәннәре дә бар. Мисалга, менә бу полиция майорын аларның һөнәри бәйрәмнәре уңаеннан заказ биреп бәйләттеләр. Ярминкәләргә гади вариантларны гына алып киләм, чөнки бәяләрен кыйммәтсенеп алмыйлар. Ә гомумән, каркаслылары да, интерьер уенчыкларым да шактый, – ди Лилия ханым.

Уенчыклар арасында куллары, аяклары, башы селкенә торганнары да бар. Аларны бәйләүнең үз сере һәм технологиясе. Хәрәкәтләнә ала торган уенчыкларны бәйләү бер атнага сузылырга мөмкин.

– Бәйләүгә караганда, уенчыкны «җыю» күбрәк вакыт ала. Аеруча да вак детальләргә күп вакыт китә. Беренче карашка алар бик гади кебек кенә. Ә аларны тоташтыра башласаң... Шуны да истә тотарга кирәк: уенчыклар белән гадәттә балалар уйный. Димәк, уенчык таралмый торган, тартканда да ертылмый, сүтелми  торган булырга тиеш. Мисал өчен, кечкенә генә тычканны да бер дә аерылмыйча мин 2,5 сәгать бәйлим, – дип эш барышы белән бүлеште оста.

Уенчыклар модельләрен ул үзе дә уйлап таба, интернеттан да карый, кайберләренең рәсемнәрен сатып та ала икән. Шулай ук түләүле онлайн мастер-классларда да катнаша. Хәтта япон телендә язылган кулланма буенча бәйләнгән уенчык­лары да бар.