Механизатор Василий Ивановның Инстаграм йолдызына әйләнү тарихы

Василий төшергән видеолар гап-гади, сөйли торган сүзләре дә бернинди дә “кәнфит кәгазе”нә төреп тәкъдим ителмәгән. Ул язылучыларына татар телендә авыл тормышы, аның яшәеше, дуслары, тракторлары турында яратып сөйли. Видеоларны да купшы рестораннардан, концерт залларыннан, сәхнә артыннан, яки кибетләрдән түгел, ә гаражда, ишегалдында, басуга тирес түгәргә барган җирендә, ватылып киткән тракторын ремонтлаганда төшерә. Һәм шулар белән халыкта кызыксыну уята бит. Аның видеоларын көнгә берничә мең кеше кереп карый.  

 

 

 

 

Посмотреть эту публикацию в Instagram

 

 

 

 

 

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от василий (@vasilijivanov7864) 17 Ноя 2018 в 1:14 PST

 

 

 

 

 

Публикация от василий (@vasilijivanov7864) 18 Сен 2018 в 10:42 PDT

Василийның видеоларын кызыксынып күзәтеп баручылар арасында танылган шәхесләр дә шактый. Алар арасында җырчылар, алып баручылар, блогерлар бар. Инстаграмда танылу серен без Василийның үзеннән сораштык.

- Инстаграмга теркәлүемә бер ел да юк әле. Үзем бу өлкәдә берни дә аңламагач, хатыным Алисә теркәп биргән иде. Башта башкаларны гына күзәтеп тордым, ә үземнең видео-постларны җәй көне куя башладым, – ди ул.

Шуннан соң, ни гаҗәп, Василийның язылучылары көнләп түгел, сәгатьләп арткан. Ә популярлыгының серен ул гадилеккә бәйләп аңлата.
- Халык минем селфи-видеоларымны гади булганым өчен үз иткәндер дип уйлыйм, чөнки барысын да ничек бар, шулай  сөйлим. Ялганламыйм бит мин. Ниндидер популярлык казану турында башыма да китермәгән идем. Төшерә торган видеоларым, гади авыл тормышы кешеләрдә шундый зур кызыксыну уятыр дип уйламаган да идем, – ди Василий.    

Инстаграм “йолдызы” безгә үзенең гаилә тормышын да сөйләде. Аңа 40 яшь икән. Хатыны Алисә белән ике бала тәрбияләп үстерәләр. Хатыны да, үзе кебек үк, авылда фермада эшли. Василий – “Вахит” исемендәге хуҗалыкның алдынгы механизаторы.

- Техникада эшләвемә егерме елдан артык инде. Эшемне дә, авылны да, хезмәттәшләремне дә бик яратам. Халык арасында видеоларым популяр булса да, көнозынына телефонда утырмыйм, чөнки эшем күп. Вакытым булганда, берничә минут кына яздырам да, социаль челтәргә эләм. Аннан соң бераз утыргач, интернетны сүндереп куям. Алайса смс-хатлар, комментарийлар күп килә. Көне буе телефонда гына утырып булмый бит, – ди ул.  

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от василий (@vasilijivanov7864) 9 Янв 2019 в 1:36 PST

Василий Инстаграмдагы аккаунтын киләчәктә тагын да киңрәк җәелдерергә тели.
- Видеоларыңны “Ютуб-канал”га урнаштырырга ярдәм итикме, камера алып бирикме, дип шалтыраталар. Аларга җавап бирмәдем әле. Ләкин авыл темасын  үзгәртмиячәкмен. Моңа кадәр ничек төшергәнмен, шулай дәвам итәчәкмен. Соңгы вакытта реклама тәкъдим итүчеләр дә артты. Киләчәктә моның буенча да шөгыльләнмәкче булам, – диде гап-гади авылның “йолдыз” механизаторы Василий.    

Кукмара, Чура авылы