Мәгариф министры Рафис Борһанов: "Бала, өенә кайткач, ял итәргә тиеш"

Татарстан вице-премьеры - мәгариф һәм фән министры Рафис Борһанов мәктәп укучыларына өй эшләрен күпләп бирүнең зыяны турында сөйләде. «Күпчелеген дәрестә бирергә кирәк. Бала кайткач, ял итәргә тиеш. Аның бит түгәрәкләре, секцияләре дә бар», - диде министр бүген 2нче лицей-интернатта узган киңәшмәдә.

Ул бүген баласы белән өй эше эшләп утырырга мәҗбүр әти-әниләрне «Преступление и наказание» әсәренә дә тиңләп карады. «Бәлки, башта укымаган әти-әниләргә җинаяте өчен җәзасы килә торгандыр. Ләкин алар арасында бит укыганнары да бар. Мәктәптә бирелгән башта кала. Без укыганда ярты сәгать булгандыр инде өй эше. Истә калмаган зур бәла булып», - ди. Министр сүзләренчә, бу темага роликлар да буш урында чыкмаган.

«Өй эшләре турында кайда гына язмыйлар. Агач койма булса, анда да язарлар иде. Өй эшләре буенча төгәл санитар нормалар бар», - диде. Беренче класста укучылар өчен өй эше бирелми. 2-4 сыйныфларда бер сәгать, 6 сыйныфка кадәр 1,5 сәгать, өлкән сыйныфлар өч сәгатькә кадәр вакытын сарыф итәргә мөмкин.